Margot, Ronald ipa-disqualify

CEBU, Philippines - Gitinguha karon sa usa ka kandidato sa Laban ng Demokratikong Pilipino (LDP) pagkakonsehal sa habagatang distrito sa dakbayan sa Sugbu nga ma-disqualify ang duha ka kandidato sa Bando Osmeña Pundok Kauswagan (BOPK) sa nahisgutang distrito.

Usa ka Rajeni Dy ang miduso og petisyon ngadto sa Comelec pinaagi sa iyang abogado nga si Atty. Dave Duallo nga magkanselar sa kandidatura nilang Margarita “Margot” Osmeña ug Ronald Cuenco nga magpapili usab pagkakonsehal sa south district.

Alang kang Dy, namakak ang duha ka kandidato sa BOPK sa ilang giduso nga Certificate of Candidacy (COC) ngadto sa Comelec tungod sa pagtuo ni Dy nga sila si Margot ug Cuenco di mga molupyo sa dakbayan.

Tungod kay nasuta sa petitioner nga ang duha mga “green card” holders ug tungod niini gipangayo ni Dy ngadto sa Comelec nga ideklarar silang Margot ug Ronald nga “ineligible” pagpapili sa umaabot nga eleksyon.

Buot sa petitioner nga manduan usab ang Board of Election Inspectors sa dakbayan nga dili apilon og ihap ang mga boto unya nga makuha nilang Margot ug Ronald.

Labaw sa tanan, gipangayo ni Dy ngadto sa Comelec nga manduan silang Margot ug Ronald pagbayad og P50 mil nga petitioner attorney’s fee, gawas sa exemplary damages nga mokantidad og P500 mil.

Kini aron sa pagpatagam sa dili kwalipikadong mga tawo nga magpapili sa bisan unsang elected position nga giingong mag-usik-usik lang sa kwarta ug panahon.

Apan matud pa sa mga respondents nga ila nang gisurender ang ilang mga “green cards” sa wala pa sila moduso sa ilang COCs niadtong Nobiyembre 30.

Matud pa ni Ronald nga siya wala mamakak sa iyang gidusong COC tungod kay siya usa ka Pilipino ug nakaparehistro usab niadtong Disyembre 12 sa miaging tuig.

“Filipino citizen man ko and before I surrendered my green card nangayo gyud ko og opinyon ni Cadungog (city election officer attorney Edwin Cadungog) and he said nga everything is fine, ang importante lang kuno nga at the time nga mo-file ko sa akong COC, Filipino resident ko,” sumala pa ni Cuenco.

Sa iyang bahin, gipadayag usab ni Margot nga dugay ra niyang gisurender ang iyang green card ug kini iyang giuli sa wala pa ma-diagnose ang iyang banang si Mayor Osmeña og urinary bladder cancer niadtong miaging tuig. Ang unang ginang sa dakbayan taud-taod nang botante diha sa barangay Kamputhaw apan mibalhin sa iyang residency sa Guadalupe niadto lang miaging Hunyo 18.

Samtang gipadayag ni mayor Osmeña nga desperado lang ang oposisyon hinungdan nga kini nangita og mga paaging ma-disqualify ang mga kandidato sa BOPK.

Masaligon ang mayor nga mabasura ra ang giduso nga petisyon ni Dy tungod kay kini giingong walay basehanan ug usa lang ka pagpanglawgaw. – BANAT NEWS