8-anyos ligsan patay

CEBU, Philippines - Patay ang usa ka 8-anyos nga batang babayeng tinun-an sa grade-3 human madam-agi ug naligsan sa usa ka trak de kargang gipanag-iya sa dakbayan sa Toledo diha sa dalan Magsaysay, sa Poblacion sa dakbayan sa Toledo niadtong Miyerkules sa alas 5:00 sa hapon. Ang biktima mao si Catherine Jane Cañete, 8, tinun-an sa South Central School Toledo City ug molupyo sa sitio Planta, Poblacion samtang ang drayber sa Isuzu Elf nga gipanag-iya sa Toledo mao si Epefanio Panugan Jr., 34, taga Cambangtog ug empleyado sa city hall.

Matud ni SPO3 Carmelito Hornales sa Toledo City Police dihang nahinabi sa Banat News, nagkuyog paglakaw ang biktima ug manghod nga si Mark Francis, 7, tinun-an sad sa Grade-1 diha sa daplin sa dalan paingon nang mamauli.

Gikatahong kalit ang pagbutho sa trak sa maong dapit ug ang bata nga diha sa daplin nadagit ug naguroy sa trak ug pagkahuman nalatayan sa luyong ligid ang lawas niini.

Gisuwayan pa unta og hatud sa Toledo City District Hospital ang biktima apan gideklarar nga dead on arrival, ang suspek boluntaryong mitahan sa kapolisan.  - Darrel Carumba (BANAT NEWS)