'Recycled' ang ipagamit

CEBU, Philippines - Gipahimangnoan sa Cebu City Schools Division ang publikong mga tunghaan sa elementarya ug high school sa dakbayan nga recyclable ug reusable materials lang maoy gamiton alang sa ilang Christmas decorations.

Ang kamandoan gipaagi sa usa ka memorandum ni City Schools Division Superintendent Doctor Lorna Rances ngadto sa nagkadaiyang public elementary ug high school.

Nagkanayon si Rances nga ang mga tunghaan kinahanglang mosaulog sa Pasko sa simple apan makahuluganon nga mga kalihukan samtang ang nasud nakasugat og mga kalamidad sa nangaging mga buwan gawas sa nasinating global financial crisis.

Sumala ni Rances nga pinaagi sa paggamit og recyclable materials pagdayan-dayan sa mga lawak-saringan makita usab niini ang creativity sa kabataan maong giawhag niini ang mga magtutudlo nga dasigon ang mga tinun-an paggamit og recyclable materials.

“Naa may daghan dihang iglalabay, ingnon nato ang mga bata nga gamiton nato nang magamit pa to decorate their classroom, mas nindot gani og naay contest,” matud ni Rances.

Samtang gipahimangnoan sad sila sa DepEd Order Number 114 nga boluntaryo lang ang kontribusyon alang sa kasaulugan sa Christmas parties ug uban pa.  - Elly Bolonos (BANAT NEWS)