5 ka Ampatuan apil sa kiha

CEBU, Philippines - Laing lima ka Ampatuan ang gipasakaan og kasong kriminal gawas sa nahaunang gipasaka batok kang Datu Unsay Mayor Andal Ampatuan Jr. sumala pa sa report sa GMA News.

Pakasuhan og apil og murder ang amahan niining si Maguindanao Gov. Andal Ampatuan Sr., usa ka mayor ug usa ka bise mayor ang girekomendar sa Criminal Investigation and Detection Group og murder may labot sa masaker sa 57 ka tawo sa Maguindanao niadtong Nobiyembre 23.

Kini mao sila si Datu Ulo Ampatuan, nga sa sayo pa giilang apo ni Andal Sr.; Bahnarin Ampatuan, nga maoy mayor sa lungsod sa Mamasapano, Maguindanao; Datu Kanor Ampatuan, nga bise mayor sa lungsod sa Salibo, Maguindanao; Toni Kenis Ampatuan, police auxiliary of the municipal police stations (MPS) sa Shariff Aguak ug sa lungsod sa Datu Unsay; Muhamad Sangki, ang konsehal sa lungsod sa Datu Abdullah Sangki, Maguindanao.

Lakip sa buot pakasuhan mao sila si Tammy Masukat, nga sa sayo pa maoy gitumbok nga kumander sa Civilian Volunteer Organization (CVO) sa Maguindanao; Tumi Timba Abas, police auxiliary of the MPS sa Shariff Aguak ug Datu Unsay; PO1 Abbey Guiadem, officer in charge sa Datu Unsay MPS; usa ka giila lang sa pangalang Commander Beri, nga usa ka CVO sa Datu Unsay MPS; ug ang usa ka nailhan lang nga Dahutay, nga sakop sa Citizen Armed Force Geographical Unit (CAFGU) nga nadestino sa sitio Binibiran, Matagabong, Ampatuan.

Gawas kanila, nabutang usab sa kaso ang “one hundred other John and Peter Does” nga nagpasabot sa mga wala pa mailhing apil sa masaker nga mikalas usab og 30 ka tigbalita.

Samtang dunay timailhang nakita sa kapolisan nga gipang-molestiya o ba kaha gilugos ang lima ka babayeng apil sa masaker tungod sa nakitang lama sa duga sa lalaki diha sa ilang mga kinatawo.

Ang mga biktimang dunay susamang mga timailhan mao sila si Lea Dalmacio, Miriam Calimbun, Mercy Palbabrica, Rahima Palawan ug si Celeste Lechonsito, ang bana sa naulahi apil usab sa gipatay nga si Eduardo Lechonsito, usa ka empleyado sa dakbayan sa Tacurong sa Sultan Kudarat.

Samtang ang maong report sa PNP misukwahi sa nahaunang pamahayag sa NBI Medico Legal nga unang mi-awtopsiya sa mga patay’ng lawas tungod kay wala’y nakita sa smear test nga susama sa nakita karon sa PNP.  - Edwin Ian Melecio ug Bryner L. Diaz gikan sa Wires (BANAT NEWS)