Immigration agent na-entrap sa NBI

CEBU, Philippines - Nadakpan sa entrapment operation sa mga ahente sa National Bureau of Investigation (NBI)-7 ang usa ka Immigration officer kagahapon diha sa North Reclamation Area sa dakbayan sa Mandaue human gireklamong nangilkil sa usa ka Amerkano.

Ang nadakpan sa NBI pinangulohan ni Agent 3, Bernard dela Cruz mao si Montor Delausan Sarip nga usa ka boarding BID officer sa pantalan.

Si NBI director Medardo de Lemos nga nahinabi sa mga tigbalita mitug-an nga midangop sa ilang buhatan niadtong Martes ang langyaw'ng si Richard John Batt, nga taga Better Living sa dakbayan sa Lapulapu.

Si Batt mipasangil diha sa iyang affidavit nga gipangayoan siya og P20 mil ni Montor aron palugwayan ang iyang visa, gikatahong mihatag na siya og pasiunang bayad nga P5 mil apan wala niini lihoka ang papeles ug gipangayon hinuon siya sa kulang nga P15 mil niini.

Tungod sa kasagmuyo midangop siya sa NBI hinungdan sa gilusad nga entrapment sa usa ka kan-anan sa Park Mall apan diha palang sa sakyanan si Batt giduol na kini sa suspek hinungdan nga diha-diha gidakop si Montor sa NBI.

Apan kagahapon sa hapon, si Batt sa dihang giimbitar sa NBI-7 aron tan-awon si Montor kini mipadayag dayon nga di na interesadong mopasaka og kiha batok sa suspek.

Tungod niini, si de Lemos mipadayag nga kasong administratiba nalang ang ilang masang-at kang Montor ngadto sa buhatan sa Visayas Ombudsman, si Montor hugtanong mihimakak sa pasangil ug nagkanayon nga wala siya makaila sa maong langyaw.  – BANAT NEWS