Amores 'gi-junk' ni Radaza

CEBU, Philippines - Giinsister sa kampo ni mayoralty candidate Junard “Ahong” Chan nga gitaktak o gi-junk ni incumbent Lapulapu City Mayor Arturo Radaza ang iyang kandidato pagka bise mayor nga si Dr. Mario Amores.

Matud pa ni Chan dugay nang plano sa kampo ni Radaza nga taktakon si Amores sa katapusang hugna sa ilang pagpili kung kinsa ang mamahimong running mate ni Paz Radaza sa pagkamayor apan gibalewala lamang kini ni Amores gumikan sa iyang hugot nga pagsalig sa magtiayong Radaza.

Apan wala na mahibulong niini si Chan gumikan sa mga panghitabo sa milabay’ng mga eleksiyon nga ang mga kaalyado ni Radaza iyang gibiyaan sa katapusang adlaw sa wala pa kini makaduso sa ilang COC's ug usa sa biktima niini mao si Dr. Corazon Ouano ug Atty. Eugene Espidido.

Gumikan niini, si Chan nga nakatimaho na niini nga siya ang sunod nga taktakon ni Radaza miuna nang daan og biya. Apan sa habig ni Radaza, kini hugot nga mihimakak sa alegasyon nga ilang gitangtang o gi-junk sa partido si incumbent Vice Mayor Mario Amores.

Matud pa ni Radaza kaugalingong hukom ni Amores ang pagpahulay una sa politika gumikan sa kaikog kaniya nga ang pag-umangkon niining si Atty. Rico Amores modagan pagkabise mayor sa ilang kaatbang. Gikatahong misaad pa si Amores nga padayong mosuporta ngadto kanila atol na unya sa pagpangampanya.

 Samtang si Bise Mayor Amores nga nahinabi sa Banat News mipadayag sa iyang pagbiya una sa politika aron siya makapahulay, apan wala kini motuki ug motubag sa mga pangutana kung tinud-anay bang boluntaryo ang iyang paghawa sa politika.

 “Ako unyang ipadayag kaninyo ang hinungdan sa akong pagbiya una sa politika human sa gikatakdang adlaw sa pagduso sa mga COC,” matud pa ni Amores.

 Pipila ka mga supporters ni Amores nga nahinabi sa Banat News mipadayag sa ilang kasagmuyo sa kalit kaayong pagkawagtang niini sa tiket ni Radaza.- Bong Soriano (BANAT NEWS)