Mga kapitan sa Talisay 'nabahin-bahin'

CEBU, Philippines - Mga kapitan nga misuporta kang kanhi Bise Mayor Aberdovey Belleza ang posibleng dunay dili na mopadayon og suporta sa naulahi human mapasabot ni Kongresista Eduardo Gullas sa kasabutan.

Ang bise presidente sa Association of the Barangay Captain (ABC) nga si Celiapo Cabuenas, kapitan sa barangay Lagtang sa pakighinabi sa Banat News kagahapon nagkanayon nga silang mga kapitan walay kalibutan kabahin sa kasabutan tali nila ni Belleza, Bucao ug sa kongresista.

Matud niini nga niadtong Martes sa hapon sa gipahigayong meeting sa mga kapitan ug ni Gullas, ang naulahi nagkanayon nga mibalibad si Belleza dihang iya kining gisukna kun modagan ba sa eleksiyon sunod tuig.

Si Bucao ug Belleza parehong kaalyado ni Gullas apan kahinumduman nga ang kanhi bise mayormisanong sa ilang gikasabutan nga kung kinsa ang dili mapili nilang duha nga mopares ni incumbent Mayor Socrates Fernandez motabang na lang sa grupo.

Ang mga kapitan nasagmuyo tungod kay nagtuo silang wala tagda ni Gullas ang manifesto nga ilang giduso nga nagsuporta kang Belleza nga ipares kang Fernandez.

Si Cabuenas mibutyag kagahapon sa Banat News nga ang ilang tumong lang mao nga suportahan si Belleza ug wala silay planong mosupak kang Gullas ug kung dunay mga gustong moapil sa ilang grupo nga modagan isip konsehal mahulog nga sila taga oposisyon.

Matud niini nga kung silang mga kapitan kung nakahibawo pa sa mga gikasabutan nila ni Gullas, Bucao ug Belleza dili mahitabong ilang pugson si Belleza.

Si Belleza ang midagan ubos sa Liberal Party (LP) ug gihugon-hugon nga mouban kang kanhi bokal Raul Bacaltos kinsa miduso na sa iyang certificate of candidacy pagkamayor sa Talisay atbang kang Fernandez.

Si Belleza sa iyang bahin sa pakighinabi niini sa Banat News nagkanayon nga tungod sa awhag sa mga kapitan ngadto kaniya misanong siya sa ilang awhag, apan miklarong wala niya supaka si Gullas. – BANAT NEWS