Asawa gihabas sa bana angol

CEBU, Philippines - Samdan sa nagkadaiyang bahin sa lawas ang usa ka asawa dihang giunay kini og tigbas sa iyang bana gumikan sa pangabubho didto sa ilang balay sa sitio Laray, barangay San Roque dakbayan sa Talisay kagahapon.

Ang biktima mao si Rosa Maria Abapo, 49, samtang ang suspetsado mao ra usab ang iyang bana nga si Domingo Abapo nga pulos nagpuyo sa Laray.

Si PO2 Narciso Alforque sa Talisay Police Station mibutyag sa Banat News nga sa wala pa mahitabo ang krimen, giingong ang suspetsado nakainom og ilimnong makahubog ug sa walay hinungdan nanghasi sa iyang asawa ug nagpasingit hangtod nga milanit kini sa iyang sundang ug gihabas ang iyang asawa.

Ang biktima nga nabulit sa samad tinigbasan ang kalawasan gidala dayon ngadto sa Talisay City District Hospital.

 Sumala sa kapolisan nga ang hinungdan sa pagpanigbas mao ang pagduda sa bana nga nangabit og laing lalaki ang iyang asawa.

Sa pagkakaron nagpahayay na ang suspetsado sa prisohan sa kapolisan sa Talisay.  - Raymond D. Abarcas (BANAT NEWS)