CEBU, Philippines - Nagsunod og file sa ilang certificates of candidacy ang labing dagkong mag-atbang sa pagkamayor sa dakbayan sa Mandaue ug Lapulapu kagahapon.
Kagahapon sa hapon mi-file na sa ilang COC si Mandaue City Mayor Jonas Cortes ug iyang runningmate nga si Banilad barangay kapitan Glenn Bercede ug mga konsehales nga sila si Benjamin Basiga, Elston Dabon, ug igsuon sa mayor nga si Demetrio Cortes Jr., Jesus Bars, John Omolon, Nenita Layesi ug tulo ka incumbent councilors nga sila si Diosdado Suico, Bethoven Andaya, ug Jefferson Ceniza.
Matud pang Cortes nga independente ang ilang grupo ug walay partidong nasyunal nga ilang giapilan, wala pa usab sila maghisgot kun si kinsang pagka-presidente ang ilang paluyohan.
Sayo sa buntag mi-file sa ilang COC si Mandaue City Mayoralty candidate Nerissa Soon-Ruiz ug runningmate nga si incumbent Vice Mayor Carlo Fortuna uban sa mga incumbent City Councilors nga sila ni Noeleen Borbajo, Alfonso “Dodong” Albano ug Editha Cabahug.
Samtang ang mga bag-ong kandidato sa ilang grupo mao sila si Umapad barangay kapitan Zaldy Lumapas, John Zantino Soon, Emmarie “Lolypop” Ouano Dizon, Harry Ceniza ug Wilmer Sanoria.
Atol sa pakighinabi sa Banat News kang Ruiz kini mipadayag nga mapasalamaton siya sa suporta sa mga banay'ng Quisumbing ug Ouano gumikan kay nakita niining dako ang kaugmaon sa dakbayan sa Mandaue apan kini magdepende sa mga tawong modala sa rendahan.
Si Luigi Quisumbing kinsa modagan pagkakongresista sa ikaunom nga distrito mipadayag nga hangtod karon managhigala pa gihapon sila ni Mayor Cortes ug wala siya'y ikakomentaryo sa pagpadagan niini sa dakbayan sa Mandaue.
Samtang nalangan og kadiyot ang pag-file og COC ni magpapatigayon Efren Pelaez sa Comelec sa Lapulapu kagahapon sa buntag dihang kalit nga mi-brownout maong hapon na kini nakapadayon.
Si Pelaez ug runningmate nga si Eduardo Tojong kuyog sa lineup sa ilang mga konsehal ilawom sa local nilang partidong Kalihokan sa Katawhan alang sa Kalamboan (KKK) mipailawom sa payong sa Liberal Party.
Wala sad mahimong babag ang rehas sa National Bilibid Prison sa Muntinlupa sa gibilanggong si kanhi Compostela mayor Gilbert Wagas aron maka-file sa iyang COC isip kandidato sa pagka-kongresista sa ikalimang distrito.
Si Wagas girepresentahan sa iyang iyaang si Virginia Wenceslao bitbit ang special power of attorney maoy mi-file sa COC, si Wagas ilawom sa partido ni kanhi presidente Joseph Estrada nga Partido ng Masang Pilipino. (BANATNEWS)