Bucao gipiling Gullas

CEBU, Philippines - Tali ni OIC Vice Mayor Alan Bucao ug kanhi bise mayor Aberdovey Belleza, si Bucao ang gipaboran ni Representante Eduardo Gullas sa unang distrito sa Sugbo nga mahimong running mate ni Mayor Socrates Fernandez sa dakbayan sa Talisay alang sa umaabot nga election sa tuig 2010.

Kini sa dihang gihimo ni Gullas ang katapusan niyang hukom sa pagpili tali kang Bucao ug Belleza nga mahimong kandidato sa pagka-bise mayor sa maong dakbayan.

Samtang si Belleza kinsa maoy gituboy sa mga kapitan sa barangay sa Talisay nga iparis kang Fernandez, wala mopakyas sa lakang sa mga opisyal sa barangay pinaagi sa pagpangandam niining mosang-at sa iyang certificate of candidacy (COC) sa buhatan sa Commission on Elections (COMELEC) karong buntag isip kandidato sa pagka-bise mayor sa independenteng partido.

Hinuon ang grupo nila ni Fernandez , Bucao ug sa mga kandidato sa konsehal nakasang-at na sa ilang COC kagahapon sa buntag nga gikuyogan mismo ni kongresista Gullas.

Sayo niini nagpaabot sila si Bucao ug Belleza sa desisyon ni Gullas bahin sa kinsa kanilang duha ang paboran nga mahimong running mate ni Fernandez.

Kini sa dihang nadawat ni Gullas ang giduso sa mga kapitan sa barangay nga nagustohan nilang molansar sa pagka-bise mayor mao si Belleza, paris ni Fernandez.

Apan tungod kay si Bucao ang daan nang gitanyagan ni Gullas sa maong puwesto, wala bawia sa kongresista ang maong tanyag ug si Bucao maoy nahukman nga iparis kang Fernandez.

Ang mga incumbent nga konsehal nga kauban sa line-up nila ni Fernandez ug Bucao nga nakasang-at na sa ilang COC mao sila si Rodulfo Cabigas, Dennis Basillote, Aaron Capala, Edward Alesna ug Bernard Odilao.

Samtang ang bag-ong nahilakip sa grupo mao sila si Josefina Conceal nga kapitan sa barangay Candulawan, presidente sa Association of Barangay Captain (ABC) nga si Osmundo Manreal Jr., Choy Aznar nga konsehal sa barangay Poblacion, Val Ylanan nga konsehal sa barangay Linao ug Atty. Samuel Nunez (kung ugaling mosugot ang asawa niini) o kaha , hulipan siya ni Atty. Owen Algoso, ang kasamtangang   legal counsel sa Talisay.

Kini tungod kay buot sa Kongresista nga dunay abogadong mahisakop sa konseho.

Kabahin sa pagka-board member, si Gullas nagkanayon nga dunay pito ka ngalan ang iyang gipili-an apan wala pa niya ibutyag kung kinsa sila. (Uban sa report ni Raymond D. Abarcas UV Journalism Intern)    (BANATNEWS)