85-anyos nanunggab sa kaaway sa anak

CEBU, Philippines - Gidunggab patay sa usa ka 85-anyos nga lolo ang batan-ong lalaking gikaaway sa iyang anak nga nakakita og sumbagay sulod sa videokihan didto sa barangay Langtad lungsod sa Naga niadtong Domingo sa alas 11:00 sa gabii.

Ang namatay sulod sa tambalanan mao si Benjie Cantal, taga barangay Tinaan samtang ang suspek mao si Canoto Santander, 85, biyudo og nagpuyo sa maong dapit.

Matud pa ni PO2 Miguel Castañares sa Naga Police dihang nahinabi sa Banat News nagkalalis ang anak sa suspek ug ang biktima niadtong higayuna ug misangko sa sinukmagay.

Ang suspek nga diha sa gawas pagkakita sa nahitabo daling misulod ug milaban sa anak dayong dunggab sa biktima diha sa sentro sa dughan.

Daling gidala sa South General Hospital ang biktima apan kagahapon sa alas 5:00 sa buntag namatay gyud kini.

Hinoon nadakpan dayun sa kapulisan ang suspek atol sa pag-responde niini sa crime scene ug gibalhug na karun sa detention cell samtang gitakdang pasakaan og kaso. (Darrel Carumba)   (BANATNEWS)