Mga nag-ambisyong molingkod sa Malacañang

CEBU, Philippines - Upat ka mga presidential aspirants lakip na ilang runningmates ug senatorial lineups ang nagsunod nga mi-file og certificates of candidacy kagahapon una pa maabti sa deadline karong adlawa. Miabot na sa 53 ka mga tawo ang misang-at og COCs pagkapresidente sa nasud.

Ang kanhi presidenteng gipalagpot sa pwesto nga si Joseph “Erap" Estrada uban sa iyang runningmate nga si Makati Mayor Jejomar Binay ug senatorial slate sa United Opposition mi-file sa ilang COCs sa Commission on Elections (Comelec) national headquarters sa Intramuros, Manila.

Si Estrada masaligong di ibasura sa Comelec ang iyang kandidatura sa ikaduhang higayon aron makalingkod bisan paman sa iyang pagkakombikto niadtong Septiyembre 2007 sa kasong pagpangawkaw og salapi sa panudlanan sa gobiyerno. Si Estrada gipasaylo na ni Presidente Gloria Macapagal Arroyo sa maong kaso.

Si Estrada kusganong namahayag nga kadto rang mga incumbent presidents ug kadtong nakatiwas sa unom ka tuig nga termino maoy did-an nang makadagan pagka-presidente pag-usab.

Ang mga mi-file sa slate sa UNO mao sila si: Senate President Juan Ponce Enrile, Senate Pro-Tempore Jose "Jinggoy" Estrada, Jayvee Bautista sa Task Force Detainees of the Philippines, Agusan del Sur Rep. Rodolfo “Ompong" Plaza, Negros Occidental Rep. Jose Apolinario “Jun" Lozada, ug NBN-ZTE scandal whistleblower Jose de Venecia III ingon man si Ramon "Bong" Revilla Jr.

Samtang si Nacionalista Party standard-bearer Manuel Villar Jr. ug running mate Loren Legarda sa National Peoples Coalition Party uban sa ilang walo ka kandidato sa senatorial slate gikuyogan sa ilang mga suporter pag-file sa ilang COCs.

Ang NP mipili sa petsang Nobiyembre 30 kagahapon dungan sa adlaw’ng natawhan ni Andres Bonifacio, nga nagsimbolo sa kaagi sa maong bayani nga gikan usab sa kabus nga pamilya.

Ang senatorial lineup naglangkob nila ni re-electionist Pia Cayetano, Ilocos Norte Rep. Ferdinand Marcos II, Gwendolyn Pimentel, lawyer Adel Tamano, kanhi Marine Capt. Ramon Mitra, kanhi labor undersecretary Susan Ople, kanhi senador Tito Sotto, binilanggong si Marine Col. Ariel Querubin, ug re-electionist Miriam Defensor-Santiago, isip guest candidate.Samtang si kanhi Manila Rep. Mark Jimenez mipahibalo kagahapon nga mokandidato usab siya pagkapangulo apan karong adlawa palang niya isang-at ang iyang COC isip usa ka independent candidate, sumala pa sa report sa ABS-CBN.

Matud pa niya nga nakaaghat kaniya pagkandidato mao ang nakitang makaluluoy nga sitwasyon sa nahitabong lunop tungod sa bagyong Ondoy ug Pepeng.

Samtang ang TV evangelist sa Jesus is Lord (JIL) Church Brother Eduardo “Bro. Eddie” Villanueva sa ikaduhang higayon mokandidato sa pagkapangulo sa nasud usab “Sa Ngalan sa Ginoo.” Kahinumduman nga niadtong 2004 elections midagan si Villanueva sa susamang posisyon apan naparot ilawom sa iyang partidong Bangon Pilipinas Movement.   (BANATNEWS)