Sunog sa Mandaue, tulo ka panimalay ugdaw

CEBU, Philippines - Naugdaw ang tulo ka mga balay ug usa ang nadanyos sa kalit nga nahitabong tulo ka minutos nga sunog sa barangay Paknaan, dakbayan sa Mandaue alas 2:44 ang takna kagahapon sa hapon.

Si FO3 Nilo Cosedo, imbestigador sa Bureau of Fire Protection sa dakbayan sa Mandaue nga nahinabi sa Banat News miingon nga nagsugod ang kalayo sa panimalay nga gipanag-iya ni George Armacin.

Matud pa ni Cosedo nga mitapon ang kalayo ngadto sa lain pang duha ka sikbit nga mga panimalay nga nalakip sa naugdaw, swerteng natabang dayon sa kabomberuhan ang kalayo dihang gisugdan na niini og dukot ang ikaupat nga kasikbit nga balay.

Ginama sa mga semi-concrete materials ang mga balay nga nag-ugdaw apan gumikan sa sayong pag-abot sa mga bombero nakontrolar kini dayon sulod lang sa tulo ka minutos.

Matud pa ni FO3 Cosedo nga si Mandaue City Fire Marshall Mayol mipaubos sa 1st alarm sa maong sunog apan wala pa matino ang kinatibuk-ang kantidad sa danyos.

Hinuon si FO3 Cosedo miingon nga walay naangol ug walay kinabuhing nakalas sa maong insidente samtang gisusi pa ang sinugdanan niini. – BANAT NEWS