80 porsiyento sa kawat sa Talisay nasulbad

CEBU, Philippines - Mikabat ngadto sa 67 ka mga kaso sa kawat ug tulis ang natala sa blotter sa Theft and Robbery Section sa Talisay City Police Station sulod sa buwan sa Nobiyembre niining tuiga apan 80 porsiyento niini nasulbad.

Sumala pa sa imbestigasyon sa kapolisan kasagaran kining nahitabo panahon sa kagabhion samtang wala ang tagbalay ug ingon man pagpanglipat sa mga kawatan.

Base sa blotter, kadaghanan sa nahitabong kawat natala gikan sa barangay Tabunok diin mikabat ngadto 23 ka insidente, gisundan sa barangay Bulacao ug San Isidro nga may tag- unom ka insidente, Dumlog ug Poblacion nga tag- upat matag usa, ug ang uban nahitabo diha sa barangay Biasong, Lawaan I, Lawaan II, Lawaan III, Lagtang, San Roque, Cansojong, Candulawan ug Campo 4.

Sa maong mga insidente dunay apil niining shop lifting, ug mga kawat sa balay diin ang mga kasagarang suspetsado mga katabang. Si Supt. Henry Biñas sa pakighinabi niini sa Banat News kagahapon nagkanayon nga 80 porsiyento sa mga kasong natala sa ilang buhatan ning tuiga ang nangasulbad.

Pipila niini miresulta sa pagkasikop sa mga responsable ug napasakaan og mga kaso, samtang duna say mga insidenteng ang mga biktima wala mohinayon og kiha tungod sa kaluoy ngadto sa mga suspek partikular niadtong mga katabang nga nangunay og pangawat sa ilang mga agalon. – BANAT NEWS