Guidelines sa botante gipagawas sa CBCP

CEBU, Philippines - Ipagawas na sa Catholic Bishops’ Conference of the Philippines (CBCP) karong adlawa ang guidelines alang sa mga botanteng Katoliko kun unsaon pagpili sa ilang mga kandidato sa 2010 elections.

Ang Episcopal Commission on Family and Life (ECFL) executive secretary Fr. Melvin Castro sa CBCP nagkanayon nga unod sa maong guidelines maghatag og gibug-aton sa mga isyu sa pamilya ug kinabuhi.

“We believe it is necessary for our voters to be guided by the Church through the Commission on Family and Life,” matud pa niini sa iyang artikulong gi-post sa website sa CBCP.

Usa sa dakong isyung masentro unya sa guidelines mao ang nakontrobersyal nga Reproductive Health bill diha sa Kongreso nga giuyonan sa daghang mga magbabalaod apan gipaninguha sa Simbahang Katoliko sa nasud nga mabasura.

Si Human Life International president, Josef Bullecer dinhi sa Sugbu ug mga relihiyosong sector dinhi sa Sugbu maoy usa sa mga mibabag niini ug milusad og mga kampanya batok niini gumikan kay gihulagway nila kining “Anti-Life Bill.” Sumala pa ni Castro, tumong sa guidelines mao nga maedukar ang mga botante ilabi ang mga kabataan kun si kinsa ang angayang ilang botohang lider nga mangulo sa nasud.

Gipaabot nga dunay mga representante sa matag probinsya sa nasud nga motambong sa paglusad unya sa guidelines diha sa St. Michael Retreat House sa Antipolo City nga gipaabot nga tambungan usab ni Papal Nuncio to the Philippines Archbishop Edward Joseph Adams, sumala pa sa report sa GMA News.

Ang Simbahang Katoliko mibahad nang daan nga di nila suportahan ang mga magbabalaod nga misuporta sa maong kontrobersyal nga balaudnon ug mibahad nga ilang awhagon ang mga botante nga himuong rekisitos sa ilang pagpili og kandidato kadtong wala mosuportar sa maong balaudnon. – BANAT NEWS