Giulo pagpusil tipi

CEBU, Philippines - Patay ang usa ka miyembro sa Crips gang samtang usa ka lalaki ang naangol sa managlahing insidente sa pagpamusil nga nahitabo sulod lang sa lima ka minutos sa miaging gabii.

Wala na makaabot nga buhi sa tambalanan si Ariel Amante Cabalda, 19, nga taga sitio Kalubihan sa Banawa-Guadalupe human kini pusila sa iyang ulo sa usa ka lalaking nagmotor diha sa dalan H. Labra sa sitio Sandayong barangay Guadalupe alas 10 pasado sa miaging gabii.

Usa ka Charry Yu nga kauban sa biktima mibutyag sa mga imbestigador sa Homicide Section nga nagbaklay silang duha sa biktima   dihang kalit nga mibutho sa ilang luyo ang usa ka lalaki dayong pusil kanila.

Maayong pagkaigo sa ulo ni Cabalda ug nasukarap sa yuta ug giusban sila pagpusil duha ka higayon apan wala makaigo ug diha-diha nagdali og dagan padulong sa motorsiklong may nagpaabot nga kauban nga nag-parking sa daplin sa karsada ug midiretso og pasirit paingon sa sitio Sandayong barangay Guadalupe.

Daling gidala ni Yu ang biktima sa Vicente Sotto Memorial Medical Center (VSMMC) apan gideklarar kini sa mga doktor nga dead on arrival.

Ang kapolisan karun padayon pa kini nga nag-imbestigar kun aduna ba kini kalambigitan sa gang war ug kun may kalambigitan ba kini sa nahitabong pagpamusil sa duha ka ig-agaw sa usa ka polis sa barangay Labangon nga miresulta sa kamatayon sa usa ka batan-on.

Singko minutos ang milabay, usa ka Jerry Eleccion, 24, nga taga sitio Kanipaan barangay Basak Pardo ang gipusil sa silingang si Nido Lausa nga dugay na niyang gikabangi.

Matud pa sa biktima padulong na siya pauli dihang kalit siyang gibabagan sa suspek ug nidiretso og pusil kaniya hinungdan sa pagkaigo sa iyang bukton.

Ang biktima nagpakitabang sa baranagy hall ug gihatud sa mga tanod sa Cebu City Medical Center samtang ang suspek miikyas. – BANAT NEWS