Lumapas gikiha ni Mayor Cortes

CEBU, Philippines - Nag-atubang karon og dakong problema si kapitan Zaldy Lumapas sa barangay Umapad, dakbayan sa Mandaue kay gikiha siya ni Mayor Jonas Cortes sa kasong falsification of documents.

Gibase ni Cortes ang iyang kiha batok kang Lumapas dihang matud pa niya nangangkon og yuta si Lumapas nga dili iyaha ug mibabag pa sa proyekto sa karsada nga ipatarok unta ni Cortes paingon ngadto sa basurahan sa Umapad.

Gumikan niini , gisang-at ni Cortes ang iyang kiha batok ni Lumapas niadtong Biyernes sa buntag didto sa Mandaue City Prosecutors office ug si assistant City Prosecutor Rolito Sarino maoy nagdawat niini.

Gisaysay ni Cortes nga wala siya makasabot kang Lumapas nganong milapas kini sa balaod pinaagi sa pagpangangkon og bahin gikan sa 2.3 ektaryas nga yuta sa gobiyerno nga unta wala man unta siya’y (Lumapas) labot niini.

Apan sa bahin ni Lumapas giisip niya nga recycle nalang kining gihimo ni Cortes kay hapit kada tuig mosang-at gyud kini og kaso batok kaniya, apan di gyud mosaler.

Matud pa ni Lumapas nga wala niya kini kahadloki kay wala gihapon kini epikto sa iyang pagkandidato pagka-konsehal sa dakbayan sa Mandaue ubos sa line-up ni Kongresista Nerissa Soon Ruiz kinsa mokandidato sa pagka-mayor atbang kang Cortes sa umaabot nga election sa tuig 2010.   (Bong Soriano)    (BANATNEWS)