Bakud party gilusad sa ika-5 distrito

CEBU, Philippines - Gilusad niadtong Biyernes ang Barug sa Kauswagan ug Demokrasya (BAKUD) Party diha sa ikalimang distrito sa lalawigan sa Sugbu diin gipahibawo ang mga bag-ong miyembro niini sa onse ka lungsod sa pagka mayor, bise mayor ngadto na sa mga konsehal alang sa umaabot eleksyon sa sunod tuig.

Ang gitudlo nga presidente sa partido mao si Ramon “Nito” Durano III samtang ang bise presidente sa maong partido mao si Kongresista Ramon “Red” Durano V1 kinsa magpasubli sa iyang ikaduhang termino isip kongresista diha sa ikalimang distrito sa lalawigan sa Sugbu.

Gipahimangnoan niini ang mga sakop sa partido nga kinahanglan ipaulahi ang personal nga interest ug unahon ang pagsilbi sa katawhan aron molambo pag-ayo ang ilang distrito

Iyang giklaro nga ang iyang igsuong si Tourism Secretary Joseph “Ace” Durano magpapili gyud sa pagkasenador sa umaabot eleksyon.

Matud sa Kongresista ang ilang partido mosuporta sa One Cebu Party ni Gobernador Gwendolyn Garcia.

Bugtong ang lungsod sa Liloan mao lamang maoy wala butangi og kandidato pagkamayor sa Bakud tungod kay ang incumbent nga si Mayor Duke Frasco anaa man sa One Cebu.

Si Demetrio Granada sa lungsod sa Tudela Isla sa Camotes dili na modagan sa pagkamayor kundili magkonsehal apan usa ka Erwin Yu maoy moatbang pagkamayor batok kang Rogelio Granada.

Sa lungsod sa Carmen si Gerald Villamor sa Bakud Party maoy moatbang kang incumbent mayor Sonia Pua samtang sa lungsod sa Compostela ang asawa ni kanhi mayor Dangoy maoy moatbang kang Mayor Richie Wagas, samtang ang ubang mayor walay kausaban gawas lamang sa mga bag-ong modagan pagka konsehal ubos gihapon sa Bakud Party.

Kagahapon sa buntag si Kongresista Durano VI pormal nang misang-at sa iyang COC diha sa buhatan ni provincial Comelec supervisor Atty. Lionel Marco Castillano.   (BANATNEWS)