Korean ambush sa Mandaue Koreans ang suspek

CEBU, Philippines - Usa ka Korean national ang gipangita karon sa kapolisan human kini giingong maoy suspetsado sa pagpamusil sa laing Korean sa dalan Plaridel sa barangay Cambaro sa dakbayan sa Mandaue sa miaging Huwebes.

Kini subay sa pakisusi sa Investigation Detection and Management Bureau (IDMB) sa kapolisan sa Mandaue City Police Office (MCPO).

Apan ang biktima nga si Han Bun Lee alyas Hoi Soon Lee, 45, human pahibaw-a sa kapolisan sa ilang pagduda base sa resulta sa ilang imbestigasyon nagdumili kini sa pagtuo.

Si SPO1 Arnulfo Quiatchon nga nahinabi sa Banat News miingon nga ang kasayuran ilang nakuha gikan sa pipila ka mga saksi sa maong pagpamusil kinsa mihulagway pa sa mga wala hiilhing lalaki sa mga pamayhon ug pinulongan nga Korean speaking.

Matud pa ni Quiatchon nga ilang gibisita ang biktima sa sulod sa pribadong tambalanan sa dakbayan sa Sugbo ug gisukitsukit labot sa nahipos nilang kasayuran sa crime scene mibutyag kanilang wala siyay kaaway nga kababayan.

Gisalikway na ang anggulo sa pagpanulis kay wala kuhaa ang butang niini.

Ang biktima nagnegosyo sa Poblacion, dakbayan sa Lapulapu og travel agency kaniadto ug karon nanag-iya sa usa ka trucking company.   (BANATNEWS)