BOC misakmit sa usa ka reloader

CEBU, Philippines - Wala makalusot sa Bureau of Customs Subport of Mactan ang pagsulay og palusot sa usa ka reloader og bala nga giagi sa Mactan Cebu International Airport sa milabay’ng adlaw.

Nasayran sa Banat News nga niadtong Nobiyembre 16, miabot ang kargamento sa MCIA gikan sa Estados Unidos. Ang nagpadala niini mao ang Dillon Precision Products Inc. ug ang consignee niini mao si Harry Magno sa dalan Kings, Dona Maria Village 2, dakbayan sa Sugbo.

Si Capt. George Macarubbo, sector commander sa Customs Police Division sa Mactan nasuta nga ang sulod sa usa ka kahon mao ang usa ka Dillon RL500B bullet reloader nga walay saktong dokumento, ilabi na ang permit to import gikan sa kagamhanan.

Matud ni Capt. Jerry Arizabal, Customs Police Division district commander, kinahanglan nga sa dili pa ipadala ang kargamento sama sa armas, bala, kagamitan niini sama sa reloader dinhi sa nasud, nagkinahanglan kini og import permit gikan sa Philippine National Police. Kapakyas pagkuha og permit makahimo sa mga sakop sa adwana pagsakmit sa kargamento.

Atol sa pagsusi, nasuta nga mokabat sa dili mominus sa P200 mil ang kantidad sa maong bullet reloader.

Gumikan sa kalapasan sa Tariff and Customs Code of the Philippines, si Macarubbo mirekomendar ngadto kang Customs Subport of Mactan Collector Rene Benavides nga moluwat og warrant of seizure and detention batok sa maong kargamento.  - Bong Soriano (BANAT NEWS)