2 patay sa baha didto's Dumanjug

CEBU, Philippines - Duha ang namatay sa grabeng pagbaha epekto sa kusog nga bunok sa ulan dala sa bagyong Urduja niadtong miaging adlaw sa lungsod sa Dumanjug.

Ang unang namatay mao ang usa ka Reynaldo Sozobrado, taga barangay Ylaya, Dumanjug kinsa nakuryentihan human aksidenteng nahikapan ang naputol nga linya sa Cebu Electric Cooperative (Cebeco).

Si SPO1 Raymundo Sala sa Dumanjug Police Station nga nahinabi sa Banat News miingon nga natumba ang punoan sa mangga ug didto kini mopaingon sa balay sa mga Sozobrado hinungdan nga naputol ang ilang linya sa kuryente.

Matud ni SPO1 Sala nga taga-hawak ang baha niadtong higayona ug nakasinggit pa si Reynaldo ngadto sa duha niya ka mga anak nga gagmay pa nga dili motunob sa tubig aron paglikay nga makuryentihan.

Apan gihikap niini ang naputol nga wire aron iisa aron dili makuryentihan ang iyang mga anak hinungdan nga siya na hinuon ang nakuryentihan. Gidali unta siya pagdala sa Barili District Hospital apan gideklarar kining dead on arrival.

Gisundan kini sa laing panghitabo sa alas 3:10 sa hapon sa dihang nabangalan ang patay’ng lawas sa 13-anyos nga si Modesto Pasiluna, taga barangay Tubod-Bitoon, nga naglutaw sa sapa sa barangay Canyuko.

Si Pasiluna nanguha og kahoy igsusugnod bisan sa kakusog sa ulan, apan gituohang naanod kini sa baha mugna sa bagyong Urduja. - BANAT NEWS