15 brgy sa Naga gibahaan

CEBU, Philippines - Mga 81 ka pamilya sa 15 ka barangay sa Naga ang apektado sa pag-awas sa sapa sa Uling nga naglagbas sa kabaranggayan niadtong Miyerkules sa gabii.

Tungod niini, ang tulay sa barangay Mainit ug spillway sa barangay Lutak naputol, mga poste sa kuryente ug telepono nangatumba ug gibahaan ang 15 ka barangay nga mao ang Bairan, Jagimit, Patag, Alpaco, Tangjagimit, Uling, Lanas, Balerong, Mayana, Lutak, Pangdan, Mainit, South Poblacion, Cogon ug Tinaan.

Si Mayor Valdemar Chiong nagkanayon nga ang baha nagsugod alas 6 sa gabii sa ibabaw’ng bahin sa barangay Uling diin mihagunos kini paingon sa ubos ug mihubas kini mga alas 11 sa gabii na.

Si Delia Tibay, social welfares office sa Naga, mibutyag nga sa pasiunang report nga upat ka mga balay sa Tinaan ang nangaanod ug tulo ka mga balay ang partially-damaged ug laing usa ka balay sa barangay Pangdan ang naguba human kini maigo sa midahiling yuta.

Ang mga tag-iya sa upat ka mga balay nga nangaanod mao sila si Jessica Lenampo, Cleofe Lenampo, Dolores Repono ug Oscar Abalorio ug ang tulo nga partially-damaged iya nila ni Mardeliza Panelagao, Mary Jane Villena ug Nora Geraldez.

Samtang sa Pangdan, ang balay nga naguba gipanag-iya sa usa ka William Pacres.

Si Tibay mibutyag nga 316 ka tawo, lakip na ang mga bata ang apektado sa Tinaan ug South Poblacion. Kagahapon sa buntag, sa ulahing report sa city social welfare’s office mao nga tulo ka balay sa Patag ang nagub-an usab sa baha.

Gawas sa mga balay, adunay kabaw ug kotse nga naanod sa baha.

Si Tibay midugang nga ang mga apektadong pamilya gipahiluna sa evacuation center sa sports complex sa Sindulan, Tinaan chapel ug Badminton court duol sa city hall. Apan kagahapon sayo sa buntag ang mga mibakwit mipauli na sa tagsa-tagsa nila ka mga lugar.

Nagtuo ang mga tawo nga adunay dakong buhawi nga miigo sa Naga hinungdan sa baha.

Kagahapon sa buntag, si Chiong nakigtigom sa mga kapitan sa mga barangay nga naapektohan alang sa mga gikinahanglan niining hinabang.

Si provincial police director Jesus Gaquing mimando ni Supt. Anthony Bagarinao, hepe sa Naga, nga mopadala og mga polis sa apektadong barangay.  - BANAT NEWS