... gikondenar sa Cebu Media ang masaker

CEBU, Philippines - Nagmartsa kagahapon ang nagkadaiyang media outfits sa Sugbu agi og pagpakita sa pagkondenar sa linuog nga masaker sa Maguindanao diin hasta mga sakop sa media giapil og patay niadtong milabay'ng Lunes. Ang mga nagkadaiyang haligi sa media dinhi sa Sugbu nagkanayon nga namahayag nga walay luna sa sibilisado ug demokratikanhong nasud ang susamang binuhatan.

Dili mominos sa 100 ka mga sakop sa tri-media sa Sugbu lakip na sa Banat News ug The Freeman mikuyog sa maong martsa nga nanukad gikan sa JY Square ngadto na sa Marcelo B. Fernan Cebu Press Center sa Brgy. Lahug dakbayan sa Sugbu.

Kasagaran sa mga nanguyog nagsuot og itom nga sinina agi og pagpakita sa pagbangutan sa gidangatan sa 34 ka mga sakop sa media nga giapil og patay sa mga armadong lalaki sa utlanan sa Shariff Aguak ug Ampatuan sa lalawigan sa Maguindanao.

Ang maong mga mediamen igo rang mikuyog sa convoy aron ibalita ang pag-file og certificate of candidacy sa mokandidato pagka-gobernador nga si Buluan Vice Mayor Toto Mangudadatu.

Si Mangudadatu wala mokuyog sa maong convoy ug ang kapikas niining si Genelyn ug mga kabanay'ng babaye kuyog ang mediamen maoy mi-file sa pagtuong di hilabtan sa mga kaatbang sa politika. Atol sa tigom sa Cebu Federation of Beat Journalist kun CFBJ sa Sugbu ang tanan nagkahiusa sa pagkondenar sa linuog nga pagpatay sa mga sakop sa media.

 Si Elias “Ely” Baquero ang presidente sa CFBJ mipadayag sa iyang kasubo sa maong insidente ug mipasar og resolution numero 8 series of 2009 nga nagkondenar sa maong binuhatan ug nag-awhag sa kagamhanan sa nasud nga mahatag ang hustisya alang sa mga biktima.

 Samtang si Komentaristang Bobby Nalzaro sa iyang bahin nga lumad usab nga taga Mindanao nasagmuyo sa kahimtang sa Mindanao nga karon lisud nang puy-an gumikan sa kasamok.

Mapasalamaton hinuon ang taga Sugbu nga di susama ang mga politiko dinhi sa lalawigan kumparar sa Mindanao nga nagtinil og mga private armies.

Samtang si Mayor Tomas Osmeña misalikway nga posibleng mahitabo dinhi ang nahitabo sa Maguindanao tungod kay wala malambigit sa partisan politics ang komunidad sa mga Muslim dinhi.  - BANAT NEWS