Ampatuan mitahan, gikiha na

CEBU, Philippines - Mitahan sa iyang kaugalingon kagahapon si Datu Unsay Mayor Andal Ampatuan Jr., nga maoy gitumbok nga ‘utok’ sa nahitabong masaker niadtong milabay'ng Lunes nga mikalas sa 57 ka tawo sa Maguindanao.

Kini human sa pag-awhag sa pamilya niini sa pagtahan aron mahatagan og kahigayunan sa pagpasabot sa iyang habig kabahin sa alegasyong giingong siya maoy nangulo sa kapin 100 ka armadong tawo nga misignit sa kapin 60 ka mga tawo ug mipatay kanila diha sa utlanan sa Shariff Aguak ug Ampatuan.

Apan sa usa ka ambush interview sa mga tigbalita, kusganong gihimakak ni Ampatuan ang alegasyong siya maoy utok sa masaker.

“There is no truth to that,” matud niini sa mga nagpaabot nga reporter sa tugpahanan sa report sa ABS-CBN.

Ang pagtahan natigayon human ma-‘takeover’ sa militar ug sa kapolisan ang Kapitolyo sa Maguindanao. Ang mga paramilitary nga magbalantay sa lalawigan gidisarmahan kagahapon .

Si Ampatuan mitahan ngadto kang Presidential Adviser on Mindanao Affairs Jesus Dureza ug gipasakay dayon sa usa ka helicopter padulong sa General Santos City ug gipasa ngadto kang Department of Justice Secretary Agnes Devanadera.

Gipahigayon dayon ang inquest proceedings sa kasong multiple murder batok kaniya diha kang Chief State Prosecutor Jovencito Zuño sa General Santos City.

Gibutyag usab ni Department of Interior and Local Government (DILG) Secretary Ronaldo Puno nga ang tibuok pamilyang Ampatuan ipailawom sa imbestigasyon tungod sa posibleng kalambigitan sa masaker. Dugang pa usab niini ang upat ka mga opisyal sa kapolisan nga sila si Maguindanao police provincial director Senior Superintendent Abusana Maguid, Shariff Aguak police Chief Inspector Sukarno Dikay, ug usa ka SPO2 Bakal, ug Inspector Diobingan.

Ang pag-apil sa imbestigasyon sa upat gibase sa mga pamahayag sa mga giingong survivors sa maong masaker nga nangangkong nakakita kanila kuyog sa mga armadong tawo nga mibabag sa mga sakyanang giluwanan sa kababayen-ang kabanay sa mokandidato pagka-gobernador nga si Buluan Bise Mayor Toto Mangudadatu.

Samtang sumala pa sa militar nga ang ubang mga nalambigit sa masaker nagtago-tago pa karon sa bukirong bahin sa Maguindanao.

Ang kapikas ni Mangudadatu nga si Genelyn giapil sa pagpatay lakip na ubang sibilyan ug 34 ka mga sakop sa media nga mokober unta sa maong filing of candidacy diha sa Comelec.

Una nang gibaharan ni Puno ang pamilyang Ampatuan nga atubangon nila ang pwersa sa gobiyerno kun di nila patahanon si Datu Unsay kagahapong adlawa.

“There has never been any appeasement. There has never been any negotiation. The families of the suspect have been told what our position is on the matter. As an example, if Datu Unsay Ampatuan would not have boarded the helicopter to bring him to General Santos City and then to Manila today, the Armed Forces of the Philippines and the Philippine National Police were prepared to take action and exert all physical force to make sure that the suspect would be brought to the inquest," matud pa ni Puno sa report sa ABS-CBN. Samtang si Press Secretary Cerge Remonde mibutyag nga gukdon usab nila ang tanang nalambigit sa krimen bisan paman nga napailawom na sa inquest proceedings si Datu Unsay Ampatuan tungod kay sinugdanan palang kini subay sa gustong mahitabo ni Presidente Gloria Arroyo nga walay pabor-pabor. Samtang ang National Police Commission mipasar og resolusyong nagmando nga tangtangan na sa ilang deputization ang tanang local government units sa Maguindanao. Kini nangahulugang ang gobernador ug mga municipal mayors sa Maguindanao wala nay direktang superbisyon sa kapolisan sa ilang mga hurisdiksyon matud pa ni Puno. Si Philippine National Police chief Jesus Verzosa mihangyo na sa kagamhanan nga tugutang ipalabay ang tanang kapolisan sa Maguindanao sa laing dapit.

Sa laing bahin, ang AFP mipadala na og usa ka batalyon, usa ka Scout Ranger Battalion ug duha ka   mechanized battalions sa Maguindanao aron maoy mobantay sa kahapsay ug kalinaw sa maong lalawigan. - Gikan sa Wires (BANAT NEWS)