CEBU, Philippines - Usa ka piniriso na usab ang nakaeskapo atol sa paghapos sa bagyong Urduja sa lungsod sa Poro, Isla sa Camotes sa milabay’ng semana.
Sila si SPO2 Rene Donaire ug PO1 Bengi Garcia, nag-atubang karon og kasong administratiba human nakaeskapo sila si Edgar Galando, 20, taga Northern Poblacion sa San Francisco nga may kasong paghupot og armas nga walay lisensya niadtong nilabay’ng semana.
Una niini niadtong Lunes sa buntag sila si SPO2 Donaire ug PO1 Garcia nibiyahi gikan sa Poro aron pagpasakag kasong kalapasan sa RA.8294 kun illegal possession of firearm batok ni Galando ug duha ka mga minor sa Provincial Prosecutors Office sa Kapitolyo.
Apan human nila napasaka ang kaso dali silang nibalik paingon sa dakbayan sa Danao aron sa pagsakay og barko balik sa Poro apan nabiyaan sila sa M/V Shuttle Ferry ug diha nangatulog sa Danao.
Nianang pagkabuntag sa ilang pagpamahaw sa usa ka karenderya nananghid ang suspek nga mangihi apan dangtan nalang ang pipila ka oras wala na kini mobalik ug posas nalang ilang nakit-an sa kasilyas.
Si Sr. Supt. Jesus Gaquing, director sa kapulisan sa lalawigan sa Sugbu nagkanayon nga dunay lapso sila si SPO2 Donaire ug PO1 Garcia hinungdan nga iya kining parelibuhan samtang magpadayon pa ang kasong administratiba batok sa duha.
Samtang ang hepe sa duha nga si Emiliano Igot nakalingkawas sa kaso tungod kay kini nag-schooling apan hulipan siya ni Sr. Insp. Alvin Valio gikan sa Catmon ug hulipan siya ni Insp. Leo Ty. - BANAT NEWS