Mahimo nang mangampanya

CEBU, Philippines - Mahimo nang makapangampanya ang mga kandidatong nakaduso na og Certificates of Candidacy bisan pa man og wala pa ang election period sumala pang Provincial Election Supervisor, Atty. Lionel Marco Castillano.

Si Castillano miingon nga giwagtang na ang kasong premature campaigning alang sa nakaduso na sa ilang sertipiko de kandidatura diha sa desisyon sa Korte Suprema niadtong adlaw nga Martes.

Gi-reverse sa Korte Suprema ang ilang unang desisyon sa kasong premature campaigning nga gipasaka sa usa ka Rosalinda Penera batok sa Comelec kinsa mi-disqualify kang Penera human nagpa-interview sa mga sakop sa media pipila ka gutlo human sa iyang pagduso sa iyang COC.

Matud pa ni Castillano nga ang pinakabag-ong desisyon sa Korte Suprema nagpawalay bili sa section 80 sa Omnibus Code for premature campaigning.

Giklaro ni Castillano nga sa maong desisyon di na makiha ang naka-file og COCs og premature campaigning bisan og magpadayon ang iyang interview sa mga sakop sa media, pagbutang og mga posters ug uban pang mga materyales sa election.

Apan gitataw ni Castillano nga sa pagsugod sa campaign period magsugod na ang mga prohibition nga anaa sa Fair Election Act sama sa gidak-on sa posters, gitas-on sa air time sa radyo ug sa television ug uban pa.

Kun duna may nabulahan niini, usa na niini ang Comelec tungod kay di na magtipun-og ang mga reklamong premature campaigning ug taas na usab ang kahigayonan sa mga kandidato nga masuroy   ang mga botante. - Chester Abadilla (BANAT NEWS)