Soon-Ruiz, Quisumbing gi-nominate sa Lakas

CEBU, Philippines - Si Kongresista Nerissa Soon-Ruiz sa ika-unom nga distrito maoy napiling nga opisyal nga kandidato sa Lakas-Kampi-Christian Muslim Democrats (Lakas-Kampi-CMD) alang sa pagka-mayor sa dakbayan sa Mandaue ug samtang si kanhi Bokal Gabriel Luis “Luigi” Quisumbing mao usab ang opisyal nga kandidato sa pagka-kongresista sa ika-unom nga distrito hulip kaniya.

Ang opisyal nga ‘certificate of nomination and acceptance’ nadawat nilang Soon-Ruiz ug Quisumbing kagahapon gikan sa kadagkoan sa Lakas-Kampi-CMD. Ang maong kalambuan gikakurat sa kampo ni Mayor Jonas Cortes kinsa sakop usab sa Lakas-Kampi-CMD nga nagtuong kini maoy himuong standard bearer sa partido alang sa pagka-mayor sa Mandaue sunod tuig.

Si Miguel Rene Dominguez, presidente sa Lakas-Kampi-CMD ug Francis Xavier Manglapus, secretary general sa partido maoy nagpirma sa certificate of nomination nga nadawat nilang Soon-Ruiz ug Quisumbing.Si Soon-Ruiz sa dihang nahinabi sa mga tigbalita naneguro nga makumpleto ang line-up sa Mandaue nga ubos sa Lakas-Kampi-CMD ug One Cebu sa ikaunom nga distrito human unya sa ilang panagtigum ni Gobernador Gwendolyn Garcia. – BANAT NEWS