Cabugao gihinganla'g bakakon ni Delos Santos

CEBU, Philippines - Gihulagway ni Kapitan Mary Ann delos Santos sa barangay Lahug nga bakakon ang labaw sa Cebu City Health Department nga si Dr. Fe Cabugao human ibutyag niini nga ang kalisod sa kahimtang sa mga health workers diha sa nahisgutang barangay maoy rason pagpabalhin niini ngadto sa laing lugar.

Partikular na niini ang problema sa tubig, suga, ug labaw sa tanan, ang gubaon nga atop sa sentro diin mutulo ang tubig panahon sa ting-uwan.

Apan gipanghimakak ni delos Santos nga nagka-problema ang sentro sa tubig ug suga tungod kay matag buwan kining gibayran sa barangay.

Matud sa kapitan nga dili makatarunganon ang pasangil sa labaw sa City Health ug kini dili usab maoy rason nga gusto niyang masayran. Subay niini gihagit ni delos Santos si Cabugao nga mobisita sa ilang barangay hall aron iyang ipakita ang resibo sa bayad sa tubig ug kuryente.

Gihulagway usab kini sa kapitan nga walay batasan tungod sa kapakyas niini pagpahibalo kaniya nga balhinon ang mga health workers.

“Ayaw na lang gud na hisguti ang tulo no kay dili man kada adlaw mag-uwan, actually naa na mi gahin pagpa-repair ana, wa pa lang ma-implement,” matud ni delos Santos. Gipasalig hinuon ni Cabugao nga bisan kun gibalhin na ang mga health workers, apan magpabilin gihapon ang ilang serbisyo diha sa barangay Lahug.  – BANAT NEWS