Winston modagan gyud sa city?

CEBU, Philippines - Posibleng modagan sa pagka-mayor sa siyudad sa Sugbo si Government Service Insurance System president ug general manager Winston Garcia sa 2010 election, kini human ang igsuon niini nga si Gob. Gwendolyn Garcia mipasumbingay niini kagahapon.

Bisan dili direkta ang pamahayag sa gobernadora nga modagan sa pagka-mayor si Winston, mipasumbingay kini sa mga sakop sa media pinaagi sa pag-ingon nga igo na kaayo alang sa usa ka Garcia nga makahimo og bati nga performance apan kun may daghang Garcia nga "qualified, competent ug committed to public service" mas makaayo sa kinabag-ang Sugbuanon, ila kining tugotan.

Gitataw hinuon ni Gwendolyn nga gitun-an pag-ayo sa pamilyang Garcia ang tinguha ni Winston.

Samtang giklaro sa gobernadora nga wala nila tugoti nga makadagan si Marlon Garcia sa pagka-mayor sa Barili tungod kay ang gisuportahan nila ang incumbent nga si Mayor Teresito Mariñas nga sakop sa One Cebu Party.

Gipasabot sa gobernadora ang polisiya sa ilang pamilya nga walay tugotan nga modagan kun may incumbent nga misuporta kaniya ug mipatuman sa iyang mga programa.

Apan miingon ang gobernadora nga sa Dumanjug, ila pang gitun-an kun makadagan na sa pagkamayor si Wilson Garcia tungod kay matapos na ang ikatulong termino ni Mayor Cesar Baricuatro.

Sa pangutana kun si Kongresista Pablo John Garcia sa ikatulong distrito mao ba ang iyang mamahimong bise gobernador, ang gobernadora nagkanayon nga hatagan nila og kahigayonan ang uban nga moalagad sa publiko.

Hinuon midugang ang gobernadora nga ang tanang mga sakop sa One Cebu Party, business sector ug ubang mga sektor iyang kunsultahon kun si kinsa ang iyang mamahimong kandidato sa pagka-bise gobernador atol sa gikatakdang general assembly sa One Cebu Party karong adlaw nga Sabado didto sa Cebu International Convention Center (CICC). (BANATNEWS)