Gun-runner cop i-dismiss

CEBU, Philippines - Ang pangulo sa kapulisan sa rehiyon siete Chief Supt. Lani-O Nerez mimando sa dinaliang imbestigasyon sa kasong administratiba batok ni PO2 Jose Reden Hortellano sa Tabogon Police Station kinsa nadakpan sa mga sakop sa Regional Intelligence Division (RID) ug 78 Infantry Batallion niadtong Sabado nga namaligya’g armas sa dakbayan sa Danao.

Si Nerez miingon nga gusto niyang mapadali ang dismissal sa serbisyo sa maong polis basta subay gihapon sa due process of law.

Si Nerez nagkanayon nga magsilbi kining warning niadtong uban pang mga polis, sibilyan nga nalambigit sa illegal nga kalihukan tungod kay tinud-on nila ug walay pasayluon bisan kun kauban pa nilang polis.

Alang kaniya angayang matangtang ang nahisgutang polis sanglit dili kini makatuman sa mga programa sa PNP paggukod sa mga illegal nga kalihukan sanglit siya mismo ang nagbuhat niini.

Si PO2 Hortellano ug kaubang si Sony Cañete Cartalla nakuhaan og usa ka M-16 Armalite, duha ka KG9, usa ka cal .45 duha ka magazine KG9, usa ka magazine sa M-16-armalite, 23 ka bala , usa ka magazine cal. 45 ug tulo ka bala niini. (Guam Logroño)   (BANATNEWS)