Pasilidad sa KEPCO luwas gamiton
CEBU, Philippines - Gipasalig sa Korean Electric Power Corp.(KEPCO) nga dili peligro sa panglawas sa tawo ug sa kinaiyahan ang coal ash sa ilang planta sukwahi sa gipasangil karon sa mga environmentalists.
Si Atty. Guillermo Dabbay Jr., ang general counsel ug tigpamaba sa KEPCO nagkanayon nga nahibalo silang mopakabana sa kalikupan hinungdan nga modernong power plant ang ilang gitukod.
Kining maong pasilidad sukwahi sa karaang coal-fired power plants, kini duna nay circulating fluidized bed combustion technology nga maoy mosala sa sulfur oxides ug nitrogen oxides nga giingong delikado sa kalikupan ug sa publiko.
Base usab sa eksaminasyon sa Department of Environment and Natural Resources (DENR) ang coal ash gikan sa karaang planta nga gitukod sa National Power Corporation (NAPOCOR) sa dekada 70 nakapasar sa toxicity ug safety standards.
Gihulagway ni Dabbay nga nanghatag og sayop nga impormasyon sa publiko ang presentasyon sa lokal nga mga environmentalists nga nag-ingong makadaot sa publiko ug kalikopan ang coal ash kay gibase kini sa karaang mga planta.
“Contrary to DENR test results, they claim that the coal ash from old NAPOCOR plant is toxic. Then they use this to ridiculously argue that we should not build modern plants. This is like convincing us not to buy brand new car because the old car spews clouds of smoke,” pasabot pang Dabbay.
Gipanglantawang ang operasyon sa KEPCO sa 2011 mosuplay og 200 megawatts nga kuryente di lang sa Cebu kundili sa kasikbit nga lalawigan sa Visayas sulod sa 10 ngadto sa 20 ka tuig samtang wala pay paigong pundo ang gobiyerno alang sa renewable energy sources nga makasuporta sa panginahanglan sa kuryente. (Brenda Batuto) (BANATNEWS)
- Latest
- Trending
