Bagyong Urduja: 1 missing, liboan ang stranded

CEBU, Philippines - Usa ka mananagat ang missing samtang libuan ka pasahero ang nangatanggong sa Sugbu ug Central Visayas gumikan sa bagyong Urduja kagahapong adlawa.

Gibutyag ni PO2 German Bulawet sa San Remegio Police dihang nahinabi sa Banat News nga ang na-missing mao si Esmael Arnado Mantos Jr., 43, taga Purok 6 barangay Tambungon sakop sa maong lungsod.

Ang asawa niini maoy nidangop sa kapulisan ug nipa-blotter human wala na mopauli si Arnado ug bugtong ang pumpboat nalang niini nga dunay dakung buslot sa atubangan ang nabangalang naglutaw sa kadagatan sa barangay Anapog.

Si Arnado mipalawod sa milabay’ng kaadlawon aron managat apan wala na kini makauli, dunay pagdudang nadasmagan kini og barko tungod sa pagkabuslot sa unahang bahin sa pumpboat ug ang pag-igo sa bagyong Urduja nga nimugna og dagkong bawod sa amihanang Sugbu.

Samtang moabot 50 ka mga barkong pasaheroan dinhi sa Central Visayas ang gidid-ang makalawig kagahapon sumala pa sa tigpamaba sa Philippine Coast Guard nga si Lt. Michael Ursabia.

Matud ni Ursabia nga 1,537 ka pasahero kagahapon sa buntag ang nangatanggong sa mga pantalan ingon man sa pantalan sa rehiyon 8.

Nagpaabot pa og advisory sa PAG-ASA kun kanus-a libkason ang storm signal number 1 dinhi sa Visayas.

Si Niel Sanchez ang information officer sa Regional Disaster Coordinating Council (RDCC)-7 nagkanayon nga sukad kagahapon sa udto wala pa sila’y nadawat nga report nga dunay nahitabong landslide sa tibuok Central Visayas.

Gialerto na ang tanang Municipal Disaster Coordinating Council (MDCC) sa kalungsoran ilabi na kadtong dunay landslide prone areas, giawhag usab ang mga tawong duol sa dagat, sapa, bukid nga mopalayo una sa peligrosong dapit.

Kagahapon sa buntag ang regional director sa Department of Education nga si Recarido Borgonia mikanselar dayon sa klase sa Kindergarten ug Grade one.

Samtang si Police Regional Office (PRO-7) director Chief Supt. Lani-O Nerez nga pangulo sa Regional Disaster Coordinating Council (RDCC-7) nagkanayon nga gawas sa MDCCs hasta ang mga sakop sa Regional Mobile Group (RMG-7) moabag sa ubang rescue team personnel.

Gitutukan sa RDCC ang Hanokol Dam sa Balilihan, Bohol tungod sa posibilidad nga mag-overflow ang tubig niini diha sa upat ka mga barangay.

Subay niini si Oscar Tabada ang regional director sa PAG-ASA Mactan miingon nga ang maong bagyo dunay gikusgon nga 50 ngadto 60 ka kilometro matag takna ug mga alas 10 kagahapon sa buntag nitugpa didto sa probinsya sa Leyte. Si Tabada mitug-an nga duna pay tulo ka mga bagyo ang moigo dinhi sa nasud sa dili pa mapupos ang Disyembre.

Karon adlawa ang mga sakop sa RDCC magtagbo pagbalik kini aron sa ilang tuki-on ang laing bagyong moabot nga bagyong “Vinta” nga mosulod sa nasud karong adlaw’ng Huwebes.   (BANATNEWS)