Kaso sa mag-uyab nga namatay giserhan

CEBU, Philippines - Giserhan sa kapulisan sa dakbayan sa Sugbu ang kaso bahin sa manag-uyab nga namatay sulod sa usa ka lawak sa motel sa barangay Mabolo niadtong Sabado sa udto.

Si Sr. Supt. Patrocinio Comendador, hepe sa kapolisan sa dakbayan sa Sugbo miingon nga hangtud way mga testigos nga mopatim-aw dili nila ipadayon ang imbestigasyon sa kamatayon nila ni Gaye Muriel del Rosario ug ex-boyfriend nga si Gerald Geonzon Espinoza.

Gipadayag ni Comendador nga ang teyoriya nga ilang gisubay karon mao ra ang bahin sa pagpakigbuwag sa babaye ngadto sa iyang hinigugma ug nga walay nalambigit nga third party.

Makigtagbo usab si Comendador sa mga tag-iya ug tagdumala’g mga motel, apartelle ug uban pa aron malikayan ang mga krimen nga maglambigit og kinabuhi sulod sa maong mga establisamento. (Guam P. Logrono)   (BANATNEWS)