Duha nadakpan sa anti-drug operation sa CCPO

CEBU, Philippines - Duha ka mga gipasanginlang mga drug personalities dinhi sa dakbayan ang nadakpan sa managlahing operasyon sa duha ka police station niadtong milabay’ng Sabado sa gabii ug kagahapon sa kaadlawon.

Si Mansawi Hadj Osman Decampong, 32, lumad nga taga Marawi City nga nagpuyo sa Mantuyong syudad sa Mandaue nadakpan sa mga sakop sa Fuente Police Station atol sa buybust operation.

Si PO2 Marvin Sanson maoy nagpakaaron-ingnong kustomer mipalit kang Decampong og duha ka gagmay’ng paketeng shabu sa kantidad nga P400 diha sa may dalan P. del Rosario Extension sa eskina sa dalan Urgello St. barangay Sambag Uno.

Human matunol ang gidiling drugas daling gisikop si Decampong ug human marekisa nakuhaan kini og dugang walo ka gagmay’ng pakete ug usa ka medium size nga paketeng pulos may sulod nga gidudahang shabu nga may gibug-atong 8.4 gramos human gitimbang diha sa PNP Crime Laboratory ug gibanabanang di momenus sa kapin 50 mil ka pesos.

Matud pa ni PO2 Sanson sa pakighinabi sa Banat News nga dugay na gyud silang nakadawat og intelligence report kabahin sa pagpamaligya sa suspetsado og illegal drugs hinungdan nga ila kining gi-aksyunan.

Samtang sa laing operasyon, usa ka tomboy ang gidakop human mamaligya og shabu sa usa ka polis atol sa laing buybust operation sa mga sakop sa Mabolo police station kagahapon sa kaadlawon sa Ayala Access Road sa barangay Mabolo.

Ang kapolisan nakasakmit og 17 ka paketeng may sulod nga gidudahang shabu gikan kang Josephine Resureccion, residente sa maong lugar.

Si SPO2 Elmer Tanjay sa Mabolo Police Station sa pakighinabi sa Banat News mibutyag nga usa sa iyang mga kaubanan (wala niya hinganli) maoy mibarog isip poseur buyer ug mipalit kang Resureccion og usa ka paketeng shabu sa kantidad nga P200.

Wala na makaikyas ang suspek dihang kalit gikuptan ug giposasan sa mga polis ug nakuhaan pa og dugang pinaketeng shabu sa iyang bulsa lakip na ang P1700 nga kwartang gituohang halin sa illegal drugs.   (Lesley Caminade)    (BANATNEWS)