Polis, laing duha gidaro sa sakyanan

CEBU, Philippines - Nadaro sa usa ka pribadong sakyanan ang usa ka motorsiklong giluwanan sa usa ka polis ug usa ka civil security personnel ingon man usa ka newsboy diha sa Pajo National Highway ubos sa unang taytayan sa dakbayan sa Lapulapu kagahapon sa kaadlawon.

Nangalandig sa tambalanan sila si PO1 Alejo Sayson, legal ang panuigon, residente sa dakbayan sa Lapulapu ug nadestino sa Mandaue City Police Office nga nagmaneho sa usa ka Honda XRM nga adunay plaka nga 3078 GH.

Naangol usab ang angkas niining si Ricardo Llamora Nuñez Jr., residente sa B. Rodriguez dakbayan sa Sugbu ug usa ka sakop sa Civil Security Unit sa lalawigan sa Bohol, samtang naangol usab si Romulo Mari, 59,taga sitio Kamangahan sa Pajo dakbayan sa Lapulapu usa ka newsboy.

Giila ang nakadasmag kanila mao si Romie Jay Galvez, 22, taga Poblacion, Consolacion sakay sa Toyota Adventure nga adunay plaka nga GPB 783 uban sa iyang tulo ka kauban.

Sa imbestigasyon ni PO2 Johnny Hernandez sa traffic division nasayran nga mga alas 2:30 kagahapon sa kaadlawon gikan sa Poblacion dakbayan sa Lapulapu si Galvez padulong mopauli sa Consolacion samtang si PO1 Sayson usab gikan sa unang taytayan sa Mactan-Mandaue bridge.

Giingong nagkasugat sila pag-abot sa traffic light sa ubos nga bahin sa maong taytayan ug nagkabangga ang maong mga sakyanan.

Si Sayson ug Nuñez nangalabay gumikan sa kakusog sa impact , apan ang sakyanan nalahos pa gyud sa center island sa maong dapit ug nabangga sa poste, si Mari usab nga namaligya og newspaper sa maong dapit naigo usab sa sakyanan.

Si Sayson ug Nuñez gidala sa Mactan Doctors Hospital sa mga sakop sa ERUF samtang si Mari gibalhin kini ngadto sa VSMMC. Si Galvez gipaabot nga pasakaan og kaso. (Bong Soriano)   (BANATNEWS)