HRM student gi-rape sa sikyu

CEBU, Philippines - Usa ka 17 anyos nga tinun-an sa kursong Hotel and Restaurant Management mipasaka og kasong pagpanglugos batok sa head guard sa usa ka unibersidad sa dalan Sancianko ning dakbayan niadtong Septembre 12 sa gabii didto sa sulod gyud mismo sa eskwelahan. Ang gipasakaan og kaso sa Cebu City Prosecutors Office mao ang usa ka Edgar Omac, hingkod ang panuigon, sakop sa Cacay Security Agency ug giingong head guard sa University of Cebu.

Sumala pa sa affidavit sa 2nd year college nga biktima nga atol sa intramurals sa tunghaan niadtong Septembre 12, siya ug ang iyang uyab nagkuyog sa 3rd floor sa CTS building apan nasaypan sila sa roving security guard nga naghimo og malay-aw nga butang tungod kay pasado alas 8 na sa kagabhion.

Mikaratel sila og dagan sa dihang gisigaan sila sa flash light sa security guard apan siya ra ang nadakpan sa head   guard nga si Omac. Sumala pa sa biktima nga gidala siya ni Omac sa opisina sa Civil Security Unit (CSU) sa eskwelahan ug gilakan ang kwarto ug gihaylo nga makig-sex kaniya kun dili kini buot nga itug-an sa mga opisyal sa tulunghaan ug ma-expel na hinuon.

Ang biktima igo lamang naghilak ug wala makatingog sa dihang gihubo na ang iyang mga sapot ug gihilabtan ang pribadong parte sa lawas.

Dihang gi-“finger” na ang biktima mihilak na kini pag-ayo tungod sa grabing kasakit hinungdan nga gihunong na lamang ni Omac ang gihimo niini ug miingon nga tiwason na lamang ang ilang gibuhat sa gawas ug gikuha niini ang numero sa biktima. Matud pa sa biktima nga giuyon-uyunan na lamang niya ang gusto sa biktima aron siya makagawas   ug gihatag ang cellphone number niini.

Apan human makabalik ang biktima sa iyang gipuy-an dinhi sa siyudad sa Sugbu, mideretso kini og uli sa probinsiya ug wala na mipadayon sa pag-eskuyla.

Ang ginikanan sa biktima nahibulong sa nahitabo sa anak ilabi na nga misulay kini sa pagkutlo sa iyang kinabuhi niadtong bulan sa Septembre.

Ang maong biktima ubos na karon sa pag-atiman sa Department of Social Welfare and Development. Si Jayvee Carillo maoy mipahiling sa biktima sa pink room diin napamatud-an nga may nahitabong penetration sa kinatawo sa biktima bisan og naalim na ang samad niini.

Sa iyang bahin, si Omac gikatahong miingon nga siya maoy giunhan sa bata ug wala kini pugsa nga makighilawas niini. Samtang ang UC pinaagi sa sekretaryo sa Office of the President nga si Sally Pepito mitumbok nga ang ilang buhatan wala mahibalo niini.

Kini tungod kay ang blotter sa giingong pagdakop sa tinun-an gibutang sa kinaluyohan sa log book. Apan gitataw ni Pepito nga ang ilang buhatan mopahigayon gyud og pakisusi sa maong insidente. (Chester Abadilla)   (BANATNEWS)