21 giputlan og ulo sa Maguindanao

CEBU, Philippines - Nagsugod na og silaob ang grabeng tensyon alang sa umaabot nga piniliay sa 2010 sa Maguindanao human 21 ka mga tawo lakip na ang asawa ug kabanay sa bise mayor sa Buluan, kuyog sa mga lokal nga media ang gisignit ug napalgang gipamutlan og ulo kagahapon.

Sa report sa ABS-CBN News (ANC) ang tigpamaba sa Armed Forces of the Philippines Lt. Col. Romeo Brawner Jr. mikumpirmar nga napalgan sa mga sakop sa 601st Infantry Brigade ang 21 ka mga patay'ng lawas nga gipangpunggotan na og ulo diha sa Ampatuan sa Maguindanao kagahapon sa hapon. Matud pa sa report nga 13 kanila mga babaye ug walo usab ang mga lalaki. Wala hinuon matumbok sa maong report kun naapil ba niini ang kapikas ni Bise Mayor Esmael “Toto” Mangudadatu.

Sa sayo pa kagahapon sa report sa ABS-CBN News kagahapon, si Buluan Vice mayor Esmael “Toto” Mangudadatu mibutyag nga ang iyang asawang si Jenalyn ug mga kabanay padulong na unta sa Comelec aron mag-file og certificate of candidacy dihang kalit nga gisignit sa gibana-banang 100 ka mga armadong lalaki diha sa lungsod sa Shariff Aguak sa Maguindanao.

Matud pa sa report nga si Mangudadatu gikatakdang modagan pagka-gobernador sa lalawigan sa Maguindanao ug ang asawa niini ug mga kabanay maoy mihikay sa iyang certificate of candidacy.

Gikatahong kuyog sa panon nga nag-file sa COC ang 30 ka mga sakop sa lokal nga media nga mokober unta sa maong kalihukan ug giapil usab sa pagsignit.

Dugang pang Mangudadatu nakaestorya pa niya ang iyang kapikas pinaagi sa cellphone human na sila masignit apan dangtan pila ka gutlo nawala na kini sa linya ug di na makontak og balik.

Dako ang pagtuo ni Mangudadatu nga politika ang motibo sa pagsignit, apan bisan paman niini di siya mohunong sa iyang tinguhang mokandidato.

Matud pa ni Mangudadatu nga alas 9:30 palang gitawgan siya sa iyang kapikas nga may mga armadong gikan sa pamilyang Ampatuan, nga karibal nila sa politika, ang mibabag kanila.

Si Mangudadatu mibutyag sa ANC nga ang mga Ampatuan maoy mipunggot sa ulo sa iyang asawa, igsuong babaye, mga kabanay, supporter ug ubang sibilyan human sila kuhai sa ilang kabtangan.

Gisugo ni Mangudadatu ang kapikas ug mga kabanay (sagad kababayen-an) sa pagtuong di sila hilabtan aron maoy mo-file sa iyang COC.

Ang mga Mangudadatu ug ang pamilya ni incumbent Andal Ampatuan dugay nang managkaribal sa politika sa Maguindanao, sumala pa sa kapolisan, si Ampatuan dunay kaugalingong private army.

Matud pang Brawner nga ang mga armadong lalaki mga deputized security sa Kapitolyo sa Maguindanao nga gi-hire sa mga Ampatuan ug giingong usa sa mga anak sa gobernador pa maoy nangulo sa pagpanignit kagahapon.

Walay bisan usa sa mga Ampatuan ilabi na ni Gobernador Ampatuan nga nakuhaan og habig sa mga sakop sa media kabahin sa alegasyon.

Ang militar padayon sa pagkawot sa mga dapit duol sa kampo sa Moro National Liberation Front (MILF) diin gikatahong gipatay ug gilubong ang mga kaubanan sa 21 nga narekober. (Report gikan sa ABS-CBN)   (BANATNEWS)