CEBU, Philippines - Gipahibawo ni Provincial Election Officer Lionel Marco Castillano nga ang ilang buhatan ingon man ang Regional Office sa Commission on Elections dinhi sa Central Visayas dili na modawat og petition for disqualification batok sa mga kandidato sa umaabot nga election sa sunod tuig.
Matud pa ni Castillano nga sa bag-ong patakaran karon didto na sa ilang ulohang buhatan sa Manila na maoy modawat sa petition for disqualification bisan sa lokal nga kandidato.
Si Castillano nagkanayaon nga ang katuyoan sa maong lagda mao nga mas dali na unyang paghatag og pagtagad sa mga petisyon kay direkta kining maatiman.
Miingon si Castillano nga ang mopetisyon batok sa usa ka kandidato gikinahanglan maoy mangunay og adto sa Manila ug adto moduso niini ug kinahanglang mobayad og 6 mil pesos nga filing fee.
Sa mao usab nga lagda, sigon pa ni Castillano ang mo-petisyon may obligasyon usab sa pagpangunay og hatag og kopya sa petisyon ngadto sa kandidatong iyang gipetisyonan aron makatubag usab dayon kini.
Apan ang gipetisyonan obligado usab nga mohatag og kopya sa iyang tubag ngadto sa nagpetisyon kaniya.
Hinuon gitataw ni Castillano nga mubo ra usab ang pagdungog sa kaso ug makaapelar dayon ang mapildi sa desisyon sa Comelec en banc ug ingon man ngadto sa Korte Suprema.
Dugang pa ni Castillano nga maayo ang bag-ong polisiya apan pabor lamang kini ngadto sa areas nga duol ra sa main office sa Comelec samtang di pabor sa mga taga Visayas ug Mindanao tungod sa gilay-on.
Usa patay sa kagubot sulod sa diskohan
Usa ang patay sa sulod sa diskohan sa barangay Inayawan kagahapon sa kaadlawon.
Pasado alas 2:30 lain usab nga lalaki ang napusilan ug wala na kaabot nga buhi sa tambalanan gikan sa diskohan sa Ocampo Drive barangay Inayawan pasado alas dos sa kaadlawon kagahapon.
Si Veremiah Marabilion Galupo, 23, taga White Road sa maong barangay naigo sa likod nga bahin sa lawas human kini gipusil sa usa ka lalaking nailhan lang sa pangalang ‘Jeprox.’
Nasayran nga ang biktima kuyog sa igsuong babaye sa disko dihang kalit miulbo ang komosyon, ang biktima gikatahong miulang sa nagkagubot apan gipusil kini sa suspek.
Ang biktima daling gidala sa Cebu City Medical Center apan ang mga doktor sa maong ospital mideklarar kaniyang patay na. Ang kapolisan pabilin pang nangita sa mamumuno. - BANAT NEWS