Taga Lahug magprotesta pag-usab vs. UP

CEBU, Philippines - Molusad na usab og laing silent protest ang nagkadaiyang mga urban poor group diha sa University of the Philippines (UP) Cebu sa mosunod nga mga adlaw sumala pa ni City administrator Francisco Fernandez kabahin sa plano sa Pagtambayayong Foundation nga maoy nangulo sa susamang kalihukan niadtong miaging semana.

Matud pa ni Fernandez nga ang silent protest gitumong lang gihapon pagpadayag sa ilang sentimento ug sa ilang pagpakita og pagsupak sa plano sa UP pagkural sa luna niini nga giukopahan sa mga biktima sa sunog diha sa barangay Lahug.

Mokapin sa 60 ka pamilya ang naapektahan sa sunog nga niigo sa sitio San Jose diha sa maong barangay niadtong Nobiyembre 10.

Ang UP buot untang mokural sa ilang luna nga gipuy-an sa mga biktima apan kini napugngan sa mga residente uban sa mga opisyal sa barangay.

Si Mayor Tomas Osmeña nga nisimpatiya usab sa apektadong pamilya nihatag og katungod kang Fernandez paghimo sa angayang buhaton pagtabang sa mga fire victim.

Agi og pasiunang lakang, ang City administrator nipasiugda og silent protest niadtong miaging semana ug susamang kalihukan ang ilusad unta karong adlawa atol sa gitakdang tigom sa UP Board of Regents karong adlawa.

Apan nasayran ni Fernandez nga gikansilar ang nahisgutang tigom hinungdan nga posibleng dili usab niini ihinayon ang ilang silent protest.

Wala masayod ang City administrator sa tinud-anay nga hinungdan apan dunay mga pagduda nga nahadlok ang UP sa ilang ilusad nga lihok protesta.

Gitataw hinuon ni Fernandez nga dili makatago ang UP sa ilang himoon nga silent protest kung itakda na usab niini ang board of regents meeting.

Nasayran nga nagpanikad na usab unta si Kongresista Raul del Mar nga motambong sa ipahigayong tigom sa UP board of regents.

Apan sama kang Fernandez, nasurpresa usab ang kongresista nga gikanselar ang nahisgutang tigom sa wala matinong hinungdan.

Ang kongresista nagplano karon nga makigkita kang UP president Emerlinda Roman aron mapadangat ug masolusyunan ang nahisgutang problema. - BANAT NEWS