CEBU, Philippines - Mipadayag og interes si kanhi Cordova Mayor Arleigh Sitoy nga magpapili pagka board member sa siksto distrito human si Bokal Victor Maambong anaa na sa ikatulo ug katapusang termino.
Si Arleigh, anak ni Cordova mayor Adelino Sitoy ning mga nangaging mga adlaw milusad og mga Sugboanong bisrock concert sa nagkalain-laing lugar sa siksto distrito.
Si Arleigh mipadayag nga karong semanaha pormal siyang mopagawas og announcement human usab sa iyang gihimong konsultasyon sa iyang pamilya.
Bugtong giklaro ni Sitoy nga kun makahukom gyud siya nga magpapili pagka-board member bugtong nasiguro niya nga mopasilong gyud ubos sa Liberal Party ni Senador Benigno ‘Noynoy’ Aquino human usab siya pormal nga nanumpa isip miyembro sa milabay'ng semana atol sa mass oath taking sa LP dinhi sa Sugbo.
Gipaabot nga ikapares ni Sitoy pagka-board member sa siksto distrito si bokal Wenceslao Gakit nga dayag na usab nga gisuportahan sa pamilyang Sitoy sa lungsod sa Cordova.
Prayoridad ni Sitoy ang pagduso og pag-preserbar sa pinulongang Bisaya sa higayun nga mahatagan og kahigayunan nga makalingkod sa Hunta Probinsyal. - BANAT NEWS