CEBU, Philippines - Patay ang usa ka kolektor human maligsi og trak de karga sa dihang natumba ang motorsiklong iyang gisakyan atol sa iyang pagsuway og overtake sa laing sakyanan diha sa barangay Naalad lungsod sa Naga niadtong Biyernes sa 1:20 sa hapon.
Ang patay nang nadangat sa tambalanan mao si Joey Gueao, 26, molupyo sa St. Joseph barangay Tunghaan, lungsod sa Minglanilla nga kolektor sa usa ka furniture company nga nagbase sa maong lugar.
Samtang ang drayber sa trak de karga mao si Manuel Magpantay, molupyo sa Hilaitan, Guilhulngan Negros Oriental.
Matud pa ni PO2 Ken Cabrera sa Naga police dihang nahinabi sa Banat News ang biktima sakay sa iyang motorsiklo paingon nga mangolekta ug pag-abot sa maong lugar misuway kini og overtake sa usa ka awto nga iyang gisundan apan tungod kay uwan-uwan niadtong higayuna nadakin-as ang ligid sa motorsiklo ug nalamba.
Ang biktima nga maayong pagkalabay buwag sa iyang motorsiklo didto napaingon sa pikas linya ug atol nga maoy pag-agi sa gikasugat niining trak de karga paingon sa siyudad sa Toledo.
Gikatahong naatrasawo na paghunong ang trak hinungdan nga naligsan ug nalatayan gyud ang lawas ni Gueao sa atubangang ligid sa walang bahin sa trak.
Daling gihunongan ug gidala sa drayber ang biktima sa Minglanilla District Hospital.
Samtang ang drayber sa trak de karga boluntaryo nga mitahan sa iyang kaugalingon. - BANAT NEWS