3 sikop sa checkpoint

CEBU, Philippines - Tulo ka tawo ang nasikop sa kapolisan atol sa checkpoint nga ilang gihimo sa nagkalainlaing lugar ning dakbayan sa Sugbo sa miaging gabii.

Sila si Rodel Dasigan Diaz, 35 ug Edmon Maglasang Esguerra , kinsa pulos taga Tambulilid, Ormoc City didto hidakpi sa Biliran road sa Ayala Business Park, barangay Luz kini tungod kay dihang gisita sila sa kapolisan wala sila makapakita og mga papeles bahin sa ilang pagkatawo.

Samtang si Jobell Loseo, 23, nga taga New Paradise, barangay Pajo, dakbayan sa Lapulapu didto madakpi sa Pier 6 sa North Reclamation area kay may giluklok kining usa ka paketing shabu sa bulsa.

Matud pa ni SPO4 Alejandro Lopez ug PO2 Pompe Tanagura nga maoy nagpahigayon sa checkpoint nga sa pagkakaron nagtingkagol na sa prisohan ang mga dinakpan samtang gipaabot ang tukmang kaso nga isang-at batok kanila.   (Lesley Caminade)   (BANATNEWS)