CEBU, Philippines - Duha ka mga batan-on ang nalandig sa tambalanan human pamusila sa tulo ka wala mailhing mga batan-on niadtong Biyernes sa gabii diha sa sitio Isla Puwa, barangay San Isidro, dakbayan sa Talisay.
Ang mga biktima giila sa mga polis nga sila si Junnie Badano, 18, residente sa nahisgutang lugar ug usa ka 16-anyos (ngan gipugngan) nga taga barangay Dumlog, Talisay.
Si Badano nakaangkon og mga samad pinusilan sa tuong bahin sa tiyan samtang samdan sa tuong tiil ang 16-anyos parehong gidala ngadto sa Talisay City District Hospital apan gipangbalhin ngadto sa Vicente Sotto Memorial Medical Center.
Sila si PO1 Erwin Denila ug PO1 Jundave David ang daling miresponde sa maong hitabo.
Si Denila nga nahinabi sa Banat News kagahapon mibutyag nga usa sa ilang gilantaw nga hinungdan sa maong insidente ang panagribal sa grupo, apan ang mga biktima mihimakak nga mga sakop sila sa fraternity o gang. (Brenda Batuto) (BANATNEWS)