Sitoy, konsehales mi-file og COCs

CEBU, Philippines - Pormal nang misang-at sa ilang Certipiko de kandidatora ang kasamtangang mayor sa lungsod sa Cordova ug mga kaubanan niini ngadto sa Comelec sa Cordova kagahapon sa buntag.Ang misang-at sa ilang COC mao si Cordova Incumbent Mayor Atty. Adelino Sitoy diin magpasubli pagkamayor ug Vice Mayor Rodrigo Jumao-as.

Samtang sa pagka-konsehal mao sila ni Ceasar Suan, Roque Yburan, Rodrigo Sumagang, Rogelio Tirol, Ximgil Dino "Em-em" Sitoy, Nicolas Tura, Lemuel Pugoy ug Edgardo Manayon.

Mga alas 10 kagahapon sa buntag pormal nga misang-at sa ilang COC sila ni Mayor Sitoy ubos sa partidong Lakas Kampi- CMD ug One Cebu Party sa lokal nga partido.

Matud pa ni Sitoy gituyo nilang sayo pagsang-at sa ilang COC aron masayod ang katawhan sa lungsod sa Cordova sa ilang padayon nga tinguha sa pagserbsiyo sa maong lungsod sukwahi sa uban nga magpadugay-dugay diin walay kasigurohan sa ilang plano sa pag-alagad sa katawhan. Dugang ni Sitoy nga usa usab kini sa pagpakita sa mga Cordovahanon nga nagkahiusa na karon ang mga politiko sa lungsod sa Cordova.

Kahinumduman nga si Vice Mayor Jumao-as ug Konsehal Suan kanhi kaatbang nga partido ni Sitoy ug karon anaa na ubos sa ilang partido.

Gisayangan usab si Sitoy sa katakos ni Nicolas Tura ang ilang Municipal Treasurer gumikan kay angayan kini nga mahimong Committee Chairman sa Finance sa konseho hinungdan nga iya kining giapil sa ilang lineup.

Nagkanayon si Sitoy nga si bisan kinsang makig-atbang kanila maghuna-huna nang daan kun angayan pa bang atbangan ang ilang lineup tungod sa mga katakos niini.

Gidawat ni Atty. Ann Jeaneth Lamban ang Comelec officer sa Cordova nga gisaksihan ni Cebu Provincial Board Member Wenceslao Gakit ang paglukat sa COCs sa grupo. (Bong Soriano)   (BANATNEWS)