CEBU, Philippines - Si Mayor Socrates Fernandez sa dakbayan sa Talisay mihimakak sa taho nga ang iyang sinagop nga si Joavan gigukod kini ug gipusil niadtong Lunes sa gabii.
Ang mayor nga nahinabi sa Banat News kagahapon nagkanayon nga kagahapon sa ala 1:30 sa hapon nagkita sila ni Joavan ug nagka-estorya tungod kay nabalaka siya sa taho nga mikatap.
Matud ni Fernandez nga iyang gisukit-sukit si Joavan kabahin sa taho ug siya gitug-anan niini nga usa ka adlaw sa wala pa mogawas ang balita sa pamantalaan usa ka electrician sa city hall ang misugat kaniya ug nagkanayon nga nakabati siya og balitang gi-ambush siya (Joavan).
Si Fernandez nagkanayon usab nga sa nahisgutang adlaw sa balita si Joavan diha sa barangay Poblacion ug nagpakuyog og mga polis diha sa lugar apan wala ibutyag niini ang mga ngalan sa polis.
Matud pa sa mayor matag moanha ang anak diha sa Poblacion naandan na niining mohapit sa police station aron magpatan-aw (bantayan) sa mga polis.
Ang hepe sa Talisay City Police Station Superintendent Henry Biñas sa pakighinabi niini sa Banat News kagahapon nagkanayon nga dili siya mokompirma o mohimakak kabahin sa giingon sa mayor nga si Joavan kuyog og mga polis diha sa Poblacion tungod kay atol sa pagkatap sa balitang napusilan kini dunay laing gibuhat ang iyang mga sakop. – BANAT NEWS