CEBU, Philippines - Nagkalain-laing armas ang nasakmit sa kapolisan nga gibiyaan sulod sa usa ka pasaheroang sakyanan diha sa sitio Upland sa barangay Poblacion sa dakbayan sa Danao niadtong milabay'ng Huwebes sa gabii.
Ang maong mga armas nasakmit atol sa usa ka checkpoint nga gibutang sa kapolisan sa maong dakbayan isip kabahin sa gipahingusgang kampanya batok sa loose firearms pinanguluhan ni Supt. Elmer Lim.
Ang maong mga armas gikatahong gisulod sa usa ka bag kansang tag-iya wala na masakpi sa kapolisan sanglit wala nay miangkon human mapakanaog ug giabandonar nalang.
Ang mga nasakmit gilangkoban sa 15 ka mga .38 paltik rebolber, upat ka .357 rebolber, tulo ka magnum .22, usa ka .32 caliber pistol, usa ka .22 pistol, ug usa ka .38 5-shooter rebolber ug ingon man unom ka nagkalain-laing magazines.
Ang nasakmit nga armas gikatakdang i-turnover ngadto sa Cebu Provincial Police Office.
Mitumaw ang mga pagdudang posibleng gamiton ang maong mga armas sa umaabot nga piniliay.
Apan si Sr. Supt. Jesus Gaquing nagkanayon nga walay nadakpang responsableng nagdala niini maong di dayon madudahang gitagana gyud kini alang sa umaabot nga piniliay.
Hinuon iyang giangkong dunay dakong posibilidad nga kini gamiton sa maong politikanhong kalihukan sa 2010.
“Dili ta makasiguro kun para asa na, pero dili gyud sad layo ang posibilidad,” matud pang Gaquing sa pakighinabi sa Banat News sa telepono.
Ang dakbayan sa Danao maoy usa sa labing naila na karon sa nasud nga daghan og mamuhatay og paltik nga mga armas gawas sa lisensyadong gunsmiths sa maong lugar, ang lisensyado ug mga tinago-tagong mamuhatay og armas parehong nagsalig sa kitaon sa pagpanghimo niini.
Kini maoy usa sa hinungdan nga daghang mga loose firearms nga masakmit sa matag karon ug unyang operasyon sa kapolisan sa maong lugar.
Sa pagkakaron ang CPPO naghingusog sa kampanya paggukod sa loose firearms. – BANAT NEWS