CEBU, Philippines - Si Gobernador Gwendolyn Garcia unya na moduso sa iyang Certificate of Candidacy (COC) sa Decembre 1 ning tuiga.
Matud pa ni Garcia nga iya unang han-ayon ang tanang miyembro sa One Cebu Party (OCP) nga opisyal nang na-rehistro sa COMELEC isip official local party sukad niadtong Nobiyembre 17.
Ang gobernadora nagkanayon nga dili siya magdali sa pagduso sa iyang COC nga mokandidato sa pagkagobernador sa lalawigan sa Sugbu kay basin dili na unya siya maka-focus sa iyang gimbuhaton.
Si Garcia, kinsa maoy presidente sa OCP nagkanayon nga mopahigayon pa siya og general assembly sa sulod sa Cebu International Convention Center (CICC) sa dili pa ang Nobiyembre 30 aron makapili ang partido sa tanang mga posisyon.
Nagkanayon ang gobernadora nga daghan siya og kapolisan nga kwalipidako nga mokandidato sa pagka- bise gobernador ug uban pa nga nagpasabot nga ang One Cebu nagkalig-on.
Dugang pa sa gobernador nga atol sa maong general assembly desisyonan usab sa partido kun si kinsa ang ilang gusto nga kandidato sa pagkapresidente nga ilang hatagan sa hugot nga suporta.
Giangkon sa gobernador nga mitambong siya sa proklamasyon ni kanhi Defense Secretary Gilbert “Gibo” Teodoro isip standard bearer sa administration party niadtong Huwebes tungod kay siya man ang provincial chairman sa Lakas-Kampi-CMD.
Apan dili pa ibulgar sa gobernador kun si Teodoro na ba gyud ang suportahan sa One Cebu. - BANAT NEWS