Mayor sa Madridejos gikiha ni Salazar

CEBU, Philippines - Ang bise mayor sa lungsod sa Madridejos nga si vice mayor Dorotheo Salazar formal nga mipasaka og kasong administratiba batok ni Mayor Salvador dela Fuente ngadto sa mga sakop sa hunta probinsyal.

 Kasong falsification of legislative public documents ubos sa Article 170 ug Article 171 paragraph 6 ug 7 sa Revised Penal Code, conduct unbecoming of a public official ug Grave abuse of discretion and authority maoy gisang-at ni Salazar.

 Kini tungod sa giingong pagtampered sa appropriation ordinance alang sa tinuig nga budget sa lungsod sa Madridejos sa sunod nga tuig nga wala niya pirmahe apan giaprobahan sa provincial board.

 Gawas ni Mayor dela Fuente, ang gilambigit sa maong kaso mao ang Local Budget officer nga si Bella Oftana, Human Resource Management Officer Catalino Tamayo, Municipal Administration officer Concordio Cogal, Municipal Treasurer Felixberta Pabualan, Water System head Bernard Oftana kinsa maoy nangusab sa naasoy nga budget ug gihatod ngadto sa provincial board.

 Gilakip usab og kiha ni Salazar si Municipal Accounting Jaime Quiogue sa kasong usurpation of authority ug falsification of legislative document tungod sa pagpreparar sa budget sa buhatan sa vice mayor ug sa konseho nga wala pay pirma niya.

 Laing gikiha mao si SB secretary Roland Gidayawan sa kasong falsification of legislative document, negligence, breach and violation of legislative procedures.

 Apil usab si konsehal Emy Mates Gabito sa kasong conduct unbecoming of a public officer tungod sa pagpaaproba sa budget sa konseho nga wala magbilin og kopya sa konseho sa Madridejos.

 Suma pa ni Salazar nga wala siya mopirma sa appropriation ordinance sa annual budget sa lungsod tungod kay may kalapasan kini sa balaod.

 Apan naaprobahan ang maong budget ordinance nga mokabat og P4.3 milyones sa hunta probinsiyal niadtong Agosto 24 ning tuiga luyo sa 299 ka mga entries niini nga gi- tamper, alter ug gi-falsify.

 Si Salazar miawhag sa mga sakop sa hunta probinsiyal nga imbestigahon ang naasoy nga mga opisyal ug hatagan og desciplinary action kun mamatud-an silang sad-an. Dugang pa ni Salazar nga ang kasong kriminal iya usab nga gipasang-at ngadto sa Ombudsman Visayas tungod lamang gihapon sa maong kahiwian sa naasoy nga mga opisyales sa Madridejos.  - Chester Abadilla ug Darrel A. Carumba (BANAT NEWS)