Police asset ang gi-ambush

CEBU, Philippines - Ang biktima sa pagpamanhig sa barangay Jaclupan gipasanginlang asset sa polis hinungdan nga giingong giinitan kini.

Si Superintendent Henry Biñas, hepe sa Talisay City Police Station sa pakighinabi niini sa Banat News kagahapon mibutyag nga usa sa impormasyon nga ilang nahipos kabahin sa insidente nga nahitabo ngadto sa Jaclupan niadtong milabay’ng gabii nga ang usa sa mga biktima ang gipasanginlang asset ug maoy tighatagan og impormasyon ngadto sa mga polis kabahin sa mga dautang tawo nga gigukod sa balaod.

Kahinumduman nga si Henry Piezas ug ang pag-umangkon niining si Capistrano Carillano ang gibanhigan samtang nagsakay sa Isuzu mini dump truck nga kargahanan og bas paingon nang modulhog gikan sa sapa sa Jaclupan ang kalit lang gipauwanan og mga bala sa wala mailhing mga lalaki.

Si Piezas kinsa maoy nagmaneho sa truck nakaangkon og samad pinusilan sa walang bahin sa nawong, walang bahin sa lawas ug bukton, wala na makaabot nga buhi ngadto sa tambalanan samtang ang pag-umangkon niining si Carillano kinsa nakaangkon og samad pinusilan sa walang kamot ang nakalayat gikan sa truck ug nakadagan pahilayo sa lugar. Matud ni Biñas nga si Carillano ang na-shock pa sa hitabo ug gihinay-hinayan nila kini sa pag-imbestigar kabahin sa insidente aron makahipos sila og dugang impormasyon aron masikop ang mga namanhig.

Ang kapolisan padayon sa ilang follow-up nga imbestigasyon sa insidente ug duna na sila’y gisundang tawo nga usa sa gidudahang dunay kalambigitan sa pagpamanhig apan sa pagkakaron wala pay mibarog nga witness sa insidente. – BANAT NEWS