Bakak Resto sirhan na sab

CEBU, Philippines - Pasirad-an na usab ni Cebu City Mayor Tomas Osmeña ang Bakak Resto Bar diha sa dalan Pelaez nga nangabli bisan wala pa malibkas ang closure order nga gipatuman batok sa nahisgutang establisamento.

Ang manager sa Bakak Resto Bar, Glenn Giltora, miangkon nga nangabli sila niadtong miaging semana ubos sa pagmando sa tag-iya niini nga si Richard Aznar.

Apan nasuta sa gipahigayong pakisusi sa mga personnel sa City Treasurer’s Office nga wala gihapon maka-comply ang maong establisamento sa gikinahanglang mga permit.

Kini sama sa business permit, permit to sell and serve liquor. Base sa kasaligang tinubdan kinsa mitug-an sa Banat News, nga matud pa may usa ka konsehal sa siyudad ang mipadala og notisya sa Bakak nga nagtugot niini sa pagpangabli.

Kini tungod kay giingong misugot na kuno si Mayor Osmeña nga makapangabli pagbalik ang kontrobersyal nga establisamento.

Wala hinoon ihimakak sa mayor nga siya giduol sa konsehal apan gitataw ni Osmeña nga ang iyang paablihan mao lang ang restaurant ug dili ang imnanan.

Tungod sa kahasol ni Osmeña, kini mimando kang City Attorney Joseph Bernaldez nga ipatuman na usab ang closure order aron ikapadayon ang pagpatak-op niini.

Gawas nga pasirad-an, misamot ang kadimalas sa Bakak Resto Bar kay gidasmagan kini sa usa ka sakyanan kagahapon sa buntag.

Usa ka Brixcy Shane Yu, 18 anyos ug tinun-an sa usa ka pribadong tunghaan sa dakbayan nga buot untang moparada sa iyang gimaneho nga Toyota Camry nga dunay plate number YAB 500 diha sa parking area sa Bakak ang midaro na hinuon sa hawanan sa maong establisamento.

Gawas sa nangadaut nga kaang ug puthaw sa tint sa Bakak, nakasaghid usab ang sakyanan ni Yu og laing auto nga naka-parking sa maong dapit.

Nalumping ang walang bahin sa atubangan sa Honda CRV ni Edwin Abaya nga nagtangag sa plate number YFX 741. Dihang nahinabi sa Banat News nagkurog pang niasoy si Yu nga kalit lang misutoy pagdagan ang iyang gimaneho nga sakyanan atol sa iyang pag-parking.

Ang traffic enforcer nga mitubag sa maong alarma nga si Robert Sarona nagtoo nga imbes brake maoy tumban ni Yu posibleng nayatakan niini ang gasolinador.  – BANAT NEWS